my.mehnat.uz сайтидаги “Роль тизими”дан фойдаланиш тартиби

Рус тилида ўқиш
preview

my.mehnat.uz сайтидаги иш берувчининг шахсий кабинетига кириш тизими қандай йўлга қўйилган? “Роль тизими” иш берувчиларга қандай имкониятларни тақдим этади?  
Kadrovik.uz  «ЯММТ» ИДАК жорий қилиш ва такомиллаштириш бўлимининг бош мутахассиси Отабек ЮНУСОВ ёрдамида технологияни ўрганиб чиқди: 

 

my.mehnat.uz сайтидаги иш берувчининг шахсий кабинетига киришнинг икки йўли мавжуд: 

  • юридик шахснинг ЭРИси ёрдамида; 

  • “Роль тизими” ёрдамида. 

Шу ўринда “нима учун “Роль тизими” шундай номланди, деган савол туғилиши мумкин. Гап шундаки, бу ўринда иш берувчи ходимнинг ролини белгилайди. Яъни,  унга иш берувчи номидан ҳаракат қилиш учун муайян чекланган ваколатлар беради. 

Демак, ”Тизимга кириш ва ишлаш учун юридик шахснинг Солиқ қўмитаси ҳузуридаги «Yangi texnologiyalar» илмий-тадқиқот марказидан олинган ЭРИси керак бўлади.  

Юридик шахснинг ЭРИси ёрдамида тизимга кирган ходимнинг хатти–ҳаракатлари чекланмаган  ва у иш берувчига мўлжалланган барча функционаллар билан ишлаши мумкин.  

Роль тизими, асосан, филиалларга эга бўлган йирик корхоналарга мўлжалланган бўлиб,  қуйидагилардан ташкил топади: 

  1. иш берувчи бўлинмада кадрлар ишига маъсул бўлган ходимни тизимга бириктиради ва унга маълум ваколатларни юклайди; 

  2. ушбу ходим my.mehnat.uz сайтидаги иш берувчининг шахсий кабинетига  жисмоний шахснинг шахсий ЭРИси ёрдамида кириши ҳамда иш берувчи томонидан унга юклатилган ваколатлар бўйича  мажбуриятларни амалга ошириши мумкин. 

my.mehnat.uz сайтига Роль тизими орқали кирган ходим  хатти-ҳаракатларида қуйидагича чекланишга  эга: 

А) ўзи ишлаётган бўлинма доирасида; 

Б) иш берувчи унга юклаган ваколатлар доирасида. 


Роль тизимини созлаш 

  1.  my.mehnat.uz сайтидаги иш берувчининг шахсий кабинетига юридик шахснинг ЭРИси ёрдамида киринг.
  2. Корхона бўлинмасини (масалан, вилоятлар бўйича филиаллар) ва унда иш ўринларини яратинг; 
  3. Бўлинмада кадрлар ишини бажариш ваколати берилган ходим билан тузилган меҳнат шартномасини рўйхатдан ўтказинг; 
  4. Инструментларнинг юқори панелида жойлашган “Ташкилот кабинети” тугмасини босинг; 
  5. Менюнинг ўнг тарафида жойлашган “Кириш ҳуқуқи” тугмасини босинг; 
  6. Очилган варақдаги  “Фойдаланувчини қўшиш” яшил тугмасини босинг; 
  7.  Очилган варақнинг тегишли йўлагида ваколат юклатилган ходимнинг  ЖШШИРини киритинг; 
  8. Очилган шаклда унинг шахсий маълумотлари автоматик равишда тўлдирилади. Сизга фақат қуйидаги сатрларни тўлдириш қолади: 

  • “Бўлинмани танлаш” - my.mehnat.uz сайтида иш юритишга ваколат берилган ходим бўлинмасини танланг; 

  • “Статус” – келтирилган ёрдамдан «фаол/фаол эмас»ни танланг. Шундай тартибда ходимга маълумотлардан фойдаланиш ҳуқуқини бериш ёки уни ўчириб қўйиш мумкин; 

  • “Меҳнат шартномалари учун амаллар”. Жадвалда учта амал келтирилган: “яратиш”, “имзолаш”, “тасдиқлаш”. Ҳар бирининг рўпарасида рухсат этилган ёки этилмаганлигини кўрсатиш лозим.  Шунингдек, шу ерда ходимнинг ушбу амаллардан фойдаланиш ёки фойдаланмаслигини белгилайсиз;  

  1. “Сақлаш” тугмасини босинг. 

Тизим созланганидан сўнг ваколатли ходим my.mehnat.uz сайтидаги иш берувчининг шахсий кабинетига ўзининг ЭРИси орқали кириши ва ўзига юклатилган мажбуриятларни бажариши мумкин. 


Иш берувчининг маълумотларидан фойдаланиш ҳуқуқини қандай қилиб тўхтатиш  мумкин 

my.mehnat.uz сайтидан ушбу ходим билан тузилган меҳнат шартномаси бекор қилинганлигини рўйхатдан ўтказишингиз билан у иш берувчининг шахсий кабинетига  жисмоний шахснинг шахсий ЭРИси ёрдамида кириш ҳуқуқидан автоматик равишда маҳрум бўлади. 

Агарда сиз ходимни ишдан бўшатмай, дейлик,  уни бошқа ишга ўтказаётган бўлсангиз,  у ҳолда:

  1. my.mehnat.uz сайтидаги иш берувчининг шахсий кабинетига юридик шахснинг ЭРИси ёрдамида киринг;
  2. Инструментларнинг юқори панелида жойлашган “Ташкилот кабинети” тугмасини босинг; 
  3. Менюнинг ўнг тарафида жойлашган “Кириш ҳуқуқи” тугмасини босинг; 
  4. Очилган жадвалдан ходимни топинг ва унинг фамилияси рўпарасидаги “Амаллар” устунининг “Кўриб чиқиш” тугмасини босинг;  
  5. Очилган жадвалнинг “Статус” йўлагидан “Фаол эмас”ни танланг; 
  6. “Сақлаш” тугмасини босинг. 

Шундан сўнг, ушбу ходим иш берувчининг шахсий кабинетига  жисмоний шахснинг шахсий ЭРИси ёрдамида кира олмайди, шунингдек  иш берувчи номидан қандайдир хатти-ҳаракатларни амалга ошира олмайди. 


Таҳририят изоҳи

Шу ўринда бир жиҳат бор: "Роль тизими" бўлинма бўйича фақат ушбу бўлинмада ишлайдиган ходимни бириктириш имкониятини тақдим этади. Бундай ҳолат ҳамма учун қулай бўлмаслиги мумкин. 

Агарда ҳар бир бўлинма учун кадрлар ишини бажарадиган ходимни ёллаш  мақсадга мувофиқ бўлмаса, тизимдан юридик шахснинг ЭРИси орқали фойдаланиш имкониятини қўлланг.  

                                                                  

  Олег ГАЕВОЙ тайёрлади