Ta’lim tashkilotlarining pedagog хodimlariga yillik uzaytirilgan mehnat ta’tili beriladi. Pedagog хodimlarning yillik uzaytirilgan mehnat ta’tilining davomiyligi Vazirlar Mahkamasi tomonidan Ijtimoiy-mehnat masalalari boʻyicha respublika uch tomonlama komissiyasi bilan kelishilgan holda belgilanadi. Shunga koʻra Vazirlar Mahkamasining qarori bilan Pedagog хodimlar uchun yillik uzaytirilgan mehnat ta’tili davomiyligi me’yorlari tasdiqlangan (VMning 26.06.2023 yildagi 263-sonli qaroriga ilova). Ushbu me’yorlarga koʻra oliy ta’lim tashkilotlarida professor-oʻqituvchilar uchun 56 kalendar kunidan iborat mehnat ta’tili belgilangan. Ushbu me’yorlarda keltirilgan хodimlarga yillik uzaytirilgan mehnat ta’tili uchun haq toʻlashda yakshanba va bayram kunlari inobatga olinmaydi.

Ta’lim tashkilotlarining oʻqituvchilar tarkibiga va uslubiyotchilariga ishning birinchi yili uchun har yilgi mehnat ta’tili oʻquvchilarning yozgi ta’tili davrida toʻliq davomiylikda berilib, ishlab berilgan vaqtiga mutanosib ravishda haq toʻlanadi. Ikkinchi va keyingi ish yillari uchun har yilgi mehnat ta’tiliga toʻliq hajmda haq toʻlanadi (MK 223-m.). Shunga koʻra, ishga 2021 yil sentyabrdan kirib, hozirda mehnat ta’tilini 06.09.2022 yildan 05.09.2023 yilgacha boʻlgan davr uchun olinsa, ta’til toʻliq 56 kun beriladi. Shunda ushbu хodimning ta’tili 3 iyuldan 27 avgustgacha davom etadi (ishga chiqish kuni – 28 avgust). Mehnat ta’tili uchun haq 48 kun uchun toʻlanadi.