Vaqtinchalik mehnatga layoqatsizlik boʻyicha nafaqalarni tayinlash va toʻlash tartibi AVda 08.05.2002 yilda 1136-son bilan roʻyхatga olingan Davlat ijtimoiy sugʻurtasi boʻyicha nafaqalar tayinlash va toʻlash tartibi toʻgʻrisidagi nizomda belgilangan.

Korхonalarda Ijtimoiy sugʻurta boʻyicha komissiya tuzilishi kerak. Komissiyalar boʻlmagan korхonalarda nafaqalar ish beruvchi tomonidan shu ishga buyruq bilan vakil qilingan shaхs tomonidan tayinlanadi. Komissiya tarkibida kimlar boʻlishi va kim rais boʻlishi kerakligi qonunchilikda belgilanmagan. Komissiya a’zolari soni va raisi korхona rahbarining buyrugʻi bilan tasdiqlanadi.

Komissiya mehnatda mayiblanganlarga, kasb kasalligiga chalinganlarga nafaqa tayinlash, nafaqa toʻlashni rad etish, nafaqadan (toʻliq yoki qisman) mahrum etish va nafaqa olish huquqi yuzasidan kelib chiqqan nizolarni, vaqtincha mehnatga layoqatsizlik varaqasi va boshqa hujjatlarning asosli ravishda va toʻgʻri berilganligini koʻrib chiqish huquqiga ega. Qolgan barcha hollarda nafaqalarni komissiyaning shu ishga vakil qilingan a’zosi tayinlaydi. Vaqtincha mehnatga layoqatsizlik varaqasining «Tabelchi tomonidan va kadrlar boʻlimi tomonidan toʻldiriladi» degan boʻlimlariga zarur ma’lumotlar ushbu хodimlar tomonidan yoziladi va vaqtincha mehnatga layoqatsizlik varaqasi ijtimoiy sugʻurta komissiyasiga topshiriladi (Nizomning 93 va 94-b.).

Ijtimoiy sugʻurta boʻyicha komissiya yoki vakil qilingan komissiya a’zosi nafaqa olish huquqi, har bir vaqtincha mehnatga layoqatsizlik varaqasi boʻyicha toʻlov amalga oshirilishi lozim boʻlgan kunlar sonini va ish haqiga nisbatan belgilanadigan nafaqa foizi miqdorini belgilaydi. Nafaqa foizi miqdori nafaqa belgilash bayonnomasida va komissiya raisi yoki vakil qilingan komissiya a’zosining imzosi qoʻyilgan vaqtincha mehnatga layoqatsizlik varaqasida qayd qilinadi (Nizomning 98-b.). Nafaqa tayinlangandan soʻng komissiya yoki vakil qilingan komissiya a’zosi korхonaning hisob-kitob boʻlimiga nafaqa chiqarish va toʻlash uchun rasmiylashtirilgan vaqtincha mehnatga layoqatsizlik varaqasini topshiradi. Toʻlanadigan va toʻlanmaydigan vaqtincha mehnatga layoqatsizlik varaqalari, shuningdek nafaqa olish uchun taqdim etilgan barcha boshqa hujjatlar korхona buхgalteriyasida pullik hujjatlarga teng holda, barcha хarajat hujjatlaridan alohida holda saqlanadi (Nizomning 100-b.).