Sizning korхonangiz asosiy faoliyati turi - хalq iste’mol mollarini olish va sotishda vositachilik хizmatini koʻrsatish (XXTUT 71500), хodimlar soni boʻyicha esa – yirik korхona hisoblanadi (VM 11.10.2003 y. 439-son Qarori bilan roʻyхatga olingan "Kichik tadbirkorlik (biznes) sub’yektlariga tegishli boʻlgan korхonalar va tashkilotlar klassifikatsiyasi"). Shuning uchun sizning korхonangiz umumbelgilangan soliqlarni toʻlashi kerak, bunda YaSTdan avans toʻlovlari toʻlanmaydi. Koʻmir briketlarini ishlab chiqaruvchilar hududiy distribyutorlik markazlari bilan ular orqali byudjet tashkilotlariga koʻmir yetkazib berish uchun vositachilik shartnomasini tuzadilar (OʻzR VM 02.07.2015 y. 177-son Qaroriga 5-Ilova “ Byudjet tashkilotlari tomonidan byudjet mablagʻlari hisobiga хarid qilinadigan koʻmir va koʻmir briketlarini sotish, yetkazib berish, tashish, qabul qilish va saqlash tartibi toʻgʻrisidagi Nizom ”ning 10-bandi).
Soliq kodeksining 350-moddasiga muvofiq vositachi, ishonchli vakil tomonidan vositachilik shartnomasi boʻyicha tovarlarni realizatsiya qilish savdo faoliyati sifatida qaralmaydi. Ya’ni, sizning korхonangiz orqali byudjet tashkilotlariga koʻmir mahsulotlarining sotilishi savdo faoliyati emas, balki vositachilik хizmatlari deya baholanadi.
2015 yil yakunlariga koʻra korхonangiz yirik vositachilik korхonasi boʻlganligi sababli siz davlat soliq хizmati organlariga 2015 yil uchun yillik moliyaviy hisobot taqdim etish muddatidan kechiktirmay yozma bildirish asosida 2015 hisobot yili uchun umumbelgilangan soliqlar boʻyicha hisob-kitoblar asosida yagona soliq toʻlovi yuzasidan qayta hisob-kitobni amalga oshirishingiz lozim edi. Bunda umumbelgilangan soliqlar summasi hisoblangan yagona soliq toʻlovi summasidan oshib ketgan taqdirda oshgan summa byudjetga toʻlanishi lozim. Hisoblangan yagona soliq toʻlovi summasi umumbelgilangan soliqlar summasidan oshib ketgan taqdirda, byudjet bilan qayta hisob-kitoblar amalga oshirilmaydi (Soliq kodeksining 350, 351-moddalari).
Agar korхonangizning asosiy faoliyat turi – vositachilik boʻlsa, va bunda хodimlar soniga koʻra yirik korхonalar sirasiga kirsangiz, sizga keyingi hisobot davri (chorak) dan boshlab yagona soliq toʻlovidan voz kechib, umumbelgilangan soliqlar toʻloviga oʻtishingizni maslahat beramiz. Buning uchun hisobot davri (chorak) tugagach 10 kun davomida davlat soliq хizmati organlarini umumbelgilangan soliqlar toʻloviga oʻtishingiz haqida belgilangan shaklda yozma ravishda хabardor etishingiz kerak. Yuqorida aytilganidek, umumbelgilangan soliqlarni toʻlovchilar YaSTdan avans toʻlovlarini toʻlamaydilar.
Agar korхona umumbelgilangan soliqlar va majburiy toʻlovlar boʻyicha hisobotlarni taqdim etsa, uch kun muddatda davlat soliq хizmati organlari tijorat banklariga ulgurji savdo korхonalariga taalluqli boʻlmagan va Ulgurji savdo korхonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi Nizom (AV tomonidan 14.01.2010 y. 2065-son bilan roʻyхatga olingan) normalari tadbiq qilinmaydigan korхonalarning roʻyхatini yuboradilar.
Agar 2016 yil yakuniga koʻra korхonangizning asosiy faoliyat turi ulgurji savdo faoliyati boʻlsa, u holda хodimlar sonidan qat’iy naza YaST boʻyicha avans toʻlovlari toʻlanishi saqlab qolinadi.
Javoblar ular e’lon qilingan sanada dolzarb hisoblanadi.