Chet el fuqarolarining Oʻzbekistonga xizmat safari qancha muddat davom etishi mumkin

Rossiya fuqarosi Oʻzbekistonga  xizmat safariga yuborilishi mumkinmi? Agar mumkin boʻlsa – qancha muddatga? Oʻzbekiston Respublikasi Mehnat kodeksining qaysi moddasida chet el fuqarolarining Oʻzbekistonga xizmat safarining eng koʻp muddati koʻrsatilgan?

Savolga kadrovik.uz iltimosiga koʻra ekspert va «Norma» kadrlar xizmati rahbari Valeriya LYaNDRES javob berdi:

– Oʻzbekiston Respublikasi mehnat qonunchiligi, shu jumladan Mehnat kodeksi Oʻzbekiston tashkilotlari va korxonalariga, shuningdek ushbu tashkilotlarning xodimlariga nisbatan tatbiq qilinadi. Maxsus Nizom (AV roʻyxat raqami 2730, 19.11.2015 yil) Oʻzbekiston korxona va tashkilotlari xodimlarini boshqa mamlakatlarga xizmat safarlariga yuborish tartibi va muddatlarini belgilaydi.

Oʻzbekiston hududiga boshqa mamlakatlardan xizmat safarlariga joʻnatish tartibi va muddatlari oʻz xodimlarini xizmat safarlariga yuboradigan tashkilotlar faoliyat koʻrsatayotgan davlatlarning qonun hujjatlarida belgilanadi. Aynan joʻnatuvchi tashkilot  xodimining chet el xizmat safariga yuborish xarajatlarini zimmasiga oladi. Siz Rossiya Federatsiyasi qonunchiligiga murojaat qilishingiz kerak.

Shuningdek, yangi Mehnat kodeksining kuchga kirishi bilan (2023 yil 30 apreldan) Oʻzbekiston qonunchiligiga «boshqa ish beruvchiga xizmat safariga yuborish» joriy qilinganini bilish foydali boʻladi.

Boshqa ish beruvchiga xizmat safariga yuborish xizmat safaridan nimasi bilan farq qiladi? Xizmat safarida xodim aniq maqsadlarni bajarish uchun joʻnab ketadi va uning mehnati joʻnatuvchi-ish beruvchi tomonidan toʻlanadi. Bunda  xizmat safariga yuborilgan shaxs boshqa ish beruvchiga vaqtinchalik doimiy ishga yuboriladi. U bilan mehnat shartnomasi vaqtincha bekor qilinadi. Qabul qiluvchi tomon u bilan muddatli mehnat shartnomasi tuzadi va xodimga toʻlovni oʻz hisobidan amalga oshiradi.

Xodimni boshqa ish beruvchiga vaqtincha xizmat safariga yuborish qoida tariqasida bir yildan koʻp boʻlmagan muddatga amalga oshirilishi mumkin . Zarur boʻlgan taqdirda xodimni vaqtincha xizmat safariga yuborish muddati   xizmat safariga yuborilgan xodim, xodimni vaqtincha xizmat safariga yuborgan ish beruvchi va xodim vaqtincha xizmat safariga yuborilgan ish beruvchi oʻrtasidagi kelishuvga binoan  koʻpi bilan bir yilga uzaytirilishi mumkin .

Vaqtincha xizmat safariga yuborilgan xodimning mehnatiga haq toʻlash qabul qiluvchi tomonidan amalga oshiriladi. Agar u toʻlovga qobiliyatsiz boʻlsa, ish uchun haq toʻlash majburiyati xodimni vaqtincha xizmat safariga yuborgan ish beruvchi zimmasiga yuklanadi. Bunday holda joʻnatuvchi mazkur ish beruvchiga nisbatan regress da’vo qoʻzgʻatish huquqiga ega . Ushbu qoidalar Oʻzbekistondagi tashkilotlarga tatbiq qilinadi va xodimni Oʻzbekistondagi tashkilotga yuborgan boshqa mamlakatlarda faoliyat yurituvchi tashkilotlar uchun toʻgʻri kelmaydi.