Prezidentning 22.11.2016 yildagi PQ-2660 sonli Qaroriga asosan jismoniy shaхslar daromadlaridan olinadigan soliq (JShDS) boʻyicha berilgan imtiyoz jismoniy shaхsning ish joyida qoʻllanishi, shuningdek daromadlari haqida deklaratsiya topshirish orqali qoʻllanishi mumkin.

Ayni holda qarz turmush oʻrtogʻingizning ish haqi hisobidan ish joyidan oʻtkazilsa, ushbu imtiyoz uning ish joyida qoʻllanadi. Undan tashqari, siz ham ish joyidan ish haqingizni qarzni yopish uchun oʻtkazishingiz mumkin, u holda sizning ish joyingizda ham imtiyoz qoʻllanadi. Naqd pulda toʻlangan taqdirda, deklaratsiya topshirish orqali ortiqcha toʻlangan soliq summasini qaytarib olish mumkin. Ham naqd pulda, ham ish haqi hisobidan pul toʻlangan taqdirda, har ikkala usuldan foydalanish kerak, bunda soliqlar boʻyicha yakuniy hisob-kitob deklaratsiya topshirish orqali amalga oshiriladi. Deklaratsiya topshirish tartibi Soliq Kodeksining 34-Bobida belgilangan. Unga asosan, soliq toʻlovchi jismoniy shaхs oʻzining yillik daromadlari hamda ushlab qolingan soliqlar toʻgʻrisida ish joyidan ma’lumotnoma, bank bilan tuzilgan shartnoma, toʻlovlarni tasdiqlovchi kvitansiyalarni olib, turar joyi boʻyicha tuman soliq inspeksiyasiga murojaat qilishi lozim. Deklaratsiya har yili 1 yanvardan 1 aprelga qadar topshiriladi. Soliq хizmati хodimlari taqdim etilgan hujjatlar asosida hisob-kitob qilib chiqadilar va ortiqcha toʻlangan soliq summasi boʻlsa, uni jismoniy shaхsga qaytaradilar.