Президентнинг 22.11.2016 йилдаги ПҚ-2660 сонли Қарорига асосан жисмоний шахслар даромадларидан олинадиган солиқ (ЖШДС) бўйича берилган имтиёз жисмоний шахснинг иш жойида қўлланиши, шунингдек даромадлари ҳақида декларация топшириш орқали қўлланиши мумкин.

Айни ҳолда қарз турмуш ўртоғингизнинг иш ҳақи ҳисобидан иш жойидан ўтказилса, ушбу имтиёз унинг иш жойида қўлланади. Ундан ташқари, сиз ҳам иш жойидан иш ҳақингизни қарзни ёпиш учун ўтказишингиз мумкин, у ҳолда сизнинг иш жойингизда ҳам имтиёз қўлланади. Нақд пулда тўланган тақдирда, декларация топшириш орқали ортиқча тўланган солиқ суммасини қайтариб олиш мумкин. Ҳам нақд пулда, ҳам иш ҳақи ҳисобидан пул тўланган тақдирда, ҳар иккала усулдан фойдаланиш керак, бунда солиқлар бўйича якуний ҳисоб-китоб декларация топшириш орқали амалга оширилади. Декларация топшириш тартиби Солиқ Кодексининг 34-Бобида белгиланган. Унга асосан, солиқ тўловчи жисмоний шахс ўзининг йиллик даромадлари ҳамда ушлаб қолинган солиқлар тўғрисида иш жойидан маълумотнома, банк билан тузилган шартнома, тўловларни тасдиқловчи квитанцияларни олиб, турар жойи бўйича туман солиқ инспекциясига мурожаат қилиши лозим. Декларация ҳар йили 1 январдан 1 апрелга қадар топширилади. Солиқ хизмати ходимлари тақдим этилган ҳужжатлар асосида ҳисоб-китоб қилиб чиқадилар ва ортиқча тўланган солиқ суммаси бўлса, уни жисмоний шахсга қайтарадилар.