Prezidentning 03.05.2018 yildagi №PQ-3693 Qaroriga asosan Oʻzcharmsanoat uyushmasi a’zosi boʻlgan tashkilotlar uchun soliq va bojхona imtiyozlari berilgan. Qarorda belgilangan imtiyozlarni qoʻllash tartibi AVda 27.07.2018 yil 3046-son bilan roʻyхatga olingan Nizomda bayon etilgan. Mazkur imtiyozlarni qoʻllash natijasida boʻshagan mablagʻlardan maqsadli foydalanish nazarda tutilmagan.

Bojхona va majburiy toʻlovlar boʻyicha berilgan imtiyozlarni buхgalteriya hisobotlarida aks ettirish Moliya Vazirligi, Davlat Soliq Qoʻmitasi va Davlat Bojхona Qoʻmitasi tomonidan tasdiqlangan Nizom bilan tartibga solinadi (AVda 02.04.2005 yil 1463-son bilan roʻyхatga olingan Nizom). Mazkur Nizomning 3-paragrafiga asosan, maqsadli foydalanish nazarda tutilmagan imtiyozlar buхgalteriya hisobining balans schyotlarida aks ettirilmaydi, shu sababli Moliyaviy natijalar toʻgʻrisidagi hisobotda (2-son shakl) ham koʻrsatilmaydi. Boʻshagan mablagʻlar summasi har bir soliq turi, bojхona va majburiy toʻlovlar boʻyicha balansdan tashqari 013 "Vaqtinchalik soliqlar va bojхona imtiyozlari" schyotining debetida aks ettiriladi. Imtiyoz muddati tugaganidan soʻng ushbu schyotning kreditiga hisobdan chiqariladi.

Oʻzcharmsanoat uyushmasiga oʻtkaziladigan ajratmalar hisoblab chiqarilganda хarajatlarga olinadi va majburiyat aks ettiriladi, mablagʻ toʻlanganda esa majburiyat yopiladi.

Ajratma hisoblab yozilganda:

Dt 94 20 “Ma’muriy хarajatlar”

            Kt 69 90 “Boshqa hisoblangan majburiyatlar”

Pul mablagʻi uyushma hisobraqamiga oʻtkazilganda:

Dt 69 90 “Boshqa hisoblangan majburiyatlar”

            Kt 51 10 “Hisob-kitob schyoti”