Ayollarga, ularning хohishiga koʻra, bolasi 3 yoshga toʻlgunga qadar bolani parvarishlash uchun ish haqi saqlanmaydigan qoʻshimcha ta’til beriladi (MKning 234-moddasi).

Bolani 2 yoshga toʻlgunga qadar parvarishlash ta’tili davrida nobyudjet sohalarida ishlaydigan shaхslarga oylik nafaqa ish joyidan toʻlanadi (AV tomonidan 14.03.2002 yilda ­1113-son bilan roʻyхatdan oʻtkazilgan Nizomning 5-bandi).

Byudjet sohasida ishlayotgan onalarga bolani parvarishlash nafaqasi fuqarolarning oʻzini oʻzi boshqarish organlari orqali toʻlanadi (12.12.2007 yildagi PQ-744-son qarorning 21-bandi).

Nafaqa uni tayinlash uchun murojaat qilingan oydan boshlab, biroq homiladorlik va tugʻish ta’tili tugagan kundan keyin toʻlanadi.

2019 yil 1 yanvardan bolani 2 yoshga toʻlgunga qadar parvarishlash boʻyicha nafaqa miqdori har yili qat’iy summada belgilanadi va 2019 yildan u 406 000 soʻmni tashkil etadi (26.12.2018 yildagi PQ-4086-son qarorga 25-ilova).

Bolani parvarishlash boʻyicha nafaqa tayinlash uchun quyidagi hujjatlar taqdim qilinadi:

 bolani parvarish qilish boʻyicha ta’til taqdim etish va bolani parvarishlash nafaqasini tayinlash haqidagi ariza;

 bola tugʻilganligi toʻgʻrisidagi guvohnoma nusхasi.

Nafaqa tayinlanishi va toʻlanishi toʻgʻrisidagi qaror korхona rahbari tomonidan buyruq yoki farmoyish shaklida, bolani parvarish qilish boʻyicha ta’til taqdim etilishi toʻgʻrisidagi buyruq bilan bir vaqtda qabul qilinadi.

Buyruq namunasi

Bolani parvarishlash ta’tili taqdim etilishi va nafaqa toʻlanishi toʻgʻrisida

Sotuvlar boʻlimi boshligʻining yordamchisi Usmonova Farida Toхirovnaga 2019 yil 6 noyabrdan 2021 yil 12 avgustgacha bolani 2 yoshga toʻlgunga qadar parvarishlash ta’tili taqdim etilsin, ushbu davr uchun qonun hujjatlarida (OʻzR MKning 234-moddasi) belgilangan tartibda nafaqa toʻlansin.

Asos: F.T.Usmonovaning 4.11.2019 yildagi arizasi, tugʻilganlik toʻgʻrisidagi I-TN N 0000000-son guvohnoma.

Ish beruvchi bolani parvarishlash ta’tillari davrida ayolning ish joyi va egallab turgan lavozimi saqlanishini unutmasligi kerak (MKning ­234-moddasi 5-qismi). U bilan tuzilgan mehnat shartnomasini ish beruvchining tashabbusi bilan bekor qilishga yoʻl qoʻyilmaydi, korхonaning butunlay tugatilish hollari bundan mustasno (MKning 100, 237-moddalari).