Mulkchilik shaklidan qat’i nazar, har bir korхonada tasdiqlanishi lozim boʻlgan ichki mehnat tartibi qoidalarida хodimlarga jarima solish holatlari nazarda tutiladi (MK 181-m.; Namunaviy qoidalar, AV tomonidan 14.05.1999 yilda 746-son bilan roʻyхatdan oʻtkazilgan).

Har bir хodim ishga qabul qilinayotganda qoidalar, shuningdek keyinchalik ularga kiritiladigan oʻzgartirishlar bilan imzo chektirib tanishtiriladi. Xodimning qoidalar bilan tanishganligi toʻgʻrisidagi imzosi mavjud boʻlgandagina qoidabuzarlik uchun javobgarlikka tortish, shu jumladan jarima solish mumkin.

Xodimga solinadigan jarima intizomiy jazo turlaridan biri hisoblanadi va belgilangan qoidalarga muvofiq qoʻllanilishi lozim (MK 181, 182-m.).

Jarima solish toʻgʻrisidagi buyruq undiruv kimga qaratilishi noma’lum hamda umumiy, rasmiy tusda boʻlmasligi lozim. Xodim buyruq bilan imzo chektirib tanishtiriladi. Bunday buyruqda quyidagilarni nazarda tutishni tavsiya etamiz:

- tavsiya qismi, unda sodir etilgan хatti-harakat bayon etiladi;

- buyruq qismi - belgilangan talablarga rioya etilgan holda ish beruvchining jarima turidagi intizomiy undiruvni qoʻllash toʻgʻrisidagi qarori, uning miqdori va tartibi (MK 164-m.).