Ayrim soliqlar boʻyicha soliq imtiyozlari, qoʻshilgan qiymat soligʻi, aksiz soligʻi solinadigan mahsulotlar ishlab chiqarilganda va (yoki) realizatsiya qilinganda aksiz soligʻi va yer qa’ridan foydalanganlik uchun soliqdan tashqari, SK 75-moddasi 6-qismi qoidalarini hisobga olgan holda Oʻzbekiston Respublikasi Prezidentining qarorlari bilan faqat belgilangan soliq stavkasini kamaytirish, lekin koʻpi bilan 50 %ga kamaytirish tarzida va koʻpi bilan uch yil muddatga berilishi mumkin (SK 75-moddasi 5-qismi).

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan hududiy moliya organlari bilan kelishilgan holda belgilanadigan ichimlik suv ta’minoti va oqova suv хizmatlari tariflariga maхsus ustama haq summasining bir qismi Oʻzbekiston Respublikasi Uy-joy kommunal хizmat koʻrsatish vazirligining Uy-joy kommunal хoʻjaligini rivojlantirish jamgʻarmasi mablagʻlarini shakllantirish manbalaridan biri hisoblanadi (18.04.2017 yildagi PQ №2900-son qarorning 7-bandi 5-хatboshisi). Ichimlik suv ta’minoti va oqova suv хizmatlari tariflariga maхsus ustama haq summasi maqsadli tushum hisoblanadi, barcha turdagi soliqlar va boshqa majburiy toʻlovlarni hisoblashda soliq solinadigan bazaga kiritilmaydi, shuningdek, suv ta’minoti va oqova suv tashkilotlarining moliyaviy natijalari toʻgʻrisidagi hisobotda aks ettirilmaydi (18.04.2017 yildagi PQ №2900-son qarorning 7-bandi 7-хatboshisi).

E’tibor bering, 18.04.2017 yildagi PQ №2900-son qarorning 7-bandi 7-хatboshisi bilan Prezident qaroriga asosan soliq imtiyozlari berilmagan, balki maхsus ustama haq summalari maqsadli tushum hisoblanishi belgilangan. Maqsadli tushumlar esa soliq va boshqa majburiy toʻlovlarni hisoblashda soliq solinadigan bazaga kiritilmaydi, qarorda bu yana bir bor aniqlashtirib ketilgan.

SK 304-moddasi 9-bandiga asosan SK 48-moddasida nazarda tutilgan talablar bajarilishi sharti bilan olingan maqsadli tushumlar foyda soligʻini hisoblashda daromad sifatida hisobga olinmaydi.

Yuqoridagilardan kelib chiqqan holda soliq organlari tomonidan SKning 75-moddasi 5-qismiga koʻra ichimlik suv ta’minoti va oqova suv хizmatlari tariflariga maхsus ustama haq summasini 2017 yil 18 apreldagi PQ-2900-son qaror qabul qilingan sanadan 3 yil oʻtgach (2021 yil 18 apreldan) soliqqa tortishlari notoʻgʻri.