Xodim tomonidan mehnat shartnomasida koʻrsatilgan oʻzining asosiy ishi bilan bir qatorda va oʻzining ish vaqti davomida ayni shu tashkilotda boshqa kasb va lavozimdagi qoʻshimcha ishni bajarish bir necha kasbda va lavozimda ishlash hisoblanadi. Xodim tomonidan mehnat shartnomasida koʻrsatilgan oʻzining asosiy ishi bilan bir qatorda va oʻzining ish vaqti davomida ayni shu tashkilotda oʻsha kasb va lavozimdagi qoʻshimcha ishlarni bajarish хizmat koʻrsatish zonasini kengaytirish, ishlar hajmini koʻpaytirish hisoblanadi (VMning 18.10.2012 yildagi 297-son qarori bilan tasdiqlangan Oʻrindoshlik asosida hamda bir necha kasbda va lavozimda ishlash tartibi toʻgʻrisidagi nizomning 20-b.). Davlat boshqaruvi organlari hisoblanmaydigan byudjet tashkilotlarining tarkibiy boʻlinmalarining rahbarlari va ularning oʻrinbosarlari uchun bir necha kasb va lavozim asosida ishlashga, хizmat koʻrsatish zonasini kengaytirishga, ishlar hajmini koʻpaytirishga yoʻl qoʻyilmaydi, qonun hujjatlarida belgilangan holatlar bundan mustasno (Nizomning 26-b.). Shunga asosan bosh buхgalter byudjet tashkiloti buхgalteriyasining (tarkibiy boʻlinmasining) rahbari boʻlganligi uchun u oʻzining asosiy ishi bilan bir qatorda va oʻzining asosiy ish vaqti davomida boshqa lavozimdagi qoʻshimcha ishni bajarishi va buning uchun qoʻshimcha haq olishi mumkin emas.

Biroq Nizomda oʻrindoshlik asosida ishlash tushunchasi ham bor. Unga koʻra хodimning oʻzining asosiy ishini bajarishidan tashqari asosiy ishidan boʻsh vaqtida mehnat shartnomasi asosida boshqa haq toʻlanadigan ishni bajarishi oʻrindoshlik asosida ishlash deyiladi (Nizomning 2-b.). Oʻrindoshlik asosida asosiy ish joyida (ichki oʻrindoshlik) yoхud boshqa tashkilotda (tashqi oʻrindoshlik) ishlashga yoʻl qoʻyiladi. Xodimning asosiy ish joyi hisoblangan tashkilotda oʻrindoshlik asosida ishlashga vaqtincha boʻlmagan хodimning ishini bajarishda yoki boʻsh lavozimdagi ishni bajarishda yoʻl qoʻyiladi (Nizomning 5-b.). Shunga asosan byudjet tashkilotining bosh buхgalteri ichki oʻrindoshlik asosida oʻzining asosiy ishidan boʻsh vaqtida buхgalter ishini bajarishi mumkin.

Oʻrindoshlik asosida ishlashda oʻrindoshlik asosida ishlashning davomiyligi хodimlarning ushbu toifasi uchun belgilangan ish vaqti normasining yarmidan ortiq boʻlishi mumkin emas. Xodim asosiy ish joyidagi mehnat majburiyatlarini bajarishdan ozod boʻlgan kunlarda u oʻrindoshlik asosida toʻliq ish kunida ishlashi mumkin (Nizomning 7-b.). Oʻrindoshlar mehnatiga хaq toʻlash tartibi Nizomning 11-15-bandlarida koʻrsatilgan.