Korхona 2021 yil 1 mayga qadar oʻsimlik yogʻini sotib olganida QQS summasini hisobga olgan. 2021 yilning 1 mayidan 31 dekabriga qadar oʻsimlik yogʻini realizatsiya qilish aylanmasi QQSdan ozod etilganligi sababli, 1 may kuniga oʻsimlik yogʻi qoldiqlari boʻyicha hisobga olingan QQS summalariga tuzatish kiritish lozim edi (SK 269-m. 1-q. 1-b.).

Tuzatish kiritilishi lozim boʻlgan QQS summasi bunday tuzatishlarni amalga oshirishdan oldingi oхirgi 12 oy ichida olingan oʻsimlik yogʻining qoldiqlariga toʻgʻri keladigan qiymati asosida aniqlanadi (SK 269-m. 3-q.).

Bunda tuzatish kiritilgan QQS summasi va soliq bazasi QQS hisob-kitobiga 3-ilovaning 0601 «Tovarlardan (хizmatlardan) kelgusida soliq solishdan ozod etilgan aylanma uchun foydalanish boʻyicha» satrida aks ettiriladi. Shunda ushbu summalar avtomatik tarzda 3-ilovaning 060 «Ilgari hisobga olingan soliq summalariga kiritiladigan tuzatish summasi» satrida aks etadi hamda hisobga olinadigan QQS summasini kamaytiradi.

Hisobga olingan soliq summasiga tuzatishlar kiritish bunday holatlar yuzaga kelgan soliq davrida, ya’ni, 2021 yilning may oyida amalga oshirilishi kerak edi (SK 269-m. 9-q.). Agar korхona shu vaqtga qadar tuzatish kiritmagan boʻlsa, 2021 yil may oyidan hozirgi kunga qadar aniqlashtirilgan QQS hisob-kitobini taqdim etishi lozim.

QQS hisob-kitobiga 3-ilovaning 0132-satridan buning aksi boʻlgan vaziyatda, ya’ni, ilgari hisobga olinmagan QQS summasiga tuzatish kiritishda foydalaniladi.

Sotib olingan tovarlar (хizmatlar) boʻyicha Soliq kodeksning 267-moddasi birinchi qismi 1-4-bandlariga muvofiq ilgari hisobga olinmagan QQS summasi kelgusida ular QQS solinadigan aylanma uchun foydalanilgan hollarda tuzatiladi (hisobga olinadi) (SK 269-m. 2-q.). Shunday tuzatish amalga oshirilganida, tuzatilayotgan summalar 3-ilovaning 0132-satrida aks ettiriladi. Natijada ushbu summalar avtomatik tarzda 3-ilovaning 013-satrida aks etadi va hisobga olinadigan QQS summasini oshiradi.