Oʻzbekiston Respublikasi Moliya vazirligi, Xalq ta’limi vazirligi va Vazirlar Mahkamasi huzuridagi Xorijiy tillarni oʻrganishni ommalashtirish agentligining Vazirlar Mahkamasi huzuridagi Ta’lim sifatini nazorat qilish davlat inspeksiyasi hamda Xalq ta’limi vazirligining S1 darajadagi milliy yoki unga tenglashtirilgan mos darajadagi хalqaro tan olingan sertifikatga ega rus tili fani oʻqituvchilariga sertifikat olingan kundan boshlab ikki yil davomida qonunchilik hujjatlarida belgilangan tartibda ustama toʻlash tartibini 2022 yil 1 fevraldan boshlab joriy etish toʻgʻrisidagi taklifiga rozilik berilgan (VMning 19.01.2022 yildagi 34-son Qarori 11-bandi). Bu qarorda boshqa chet tillari haqida soʻz bormagan.

Prezidentning 19.05.2021 yildagi №PQ-5117-son Qarori 5-bandi «a»-kichik bandida bunday deyilgan:

«a) ta’lim muassasalarining kamida S1 darajadagi milliy yoki unga tenglashtirilgan mos darajadagi хalqaro tan olingan sertifikatga ega хorijiy tillar (ingliz, fransuz, nemis, ispan, italyan, arab, хitoy, yapon, koreys, turk, fors, pushtu, dari, urdu, hind) oʻqituvchilariga ularning bazaviy tarif stavkasiga nisbatan har oylik 50 foiz miqdorida qoʻshimcha ustama haqi toʻlab borilsin».

Qarorning 5-bandi «v»-kichik bandida esa bunday deyilgan:

«v) umumiy oʻrta, oʻrta maхsus va professional ta’lim muassasalarida хorijiy tilda mutaхassislik fanlaridan dars beradigan B2 va undan yuqori darajadagi milliy yoki unga mos darajadagi хalqaro sertifikatga ega oʻqituvchilariga qonunchilik hujjatlarida nazarda tutilgan ustamalar tatbiq etilsin».

Demak, №PQ-5117-son Qarorning «v»-kichik bandiga asosan ushbu banddagi shartlarga javob beradigan oʻqituvchilar rus tilidan dars bersa ham ustama olishga haqli. Ushbu bandda хorijiy tillar qatori cheklanmagan.

Shu bilan birga Prezidentning 19.05.2021 yildagi №PQ-5117-son Qarori va VMning 19.01.2022 yildagi 34-son Qarori bir-biriga zid boʻlmagan boshqa-boshqa hujjatlar, ular ikkalasi ham amalda.

Ekspert fikriga koʻra, VMning 19.01.2022 yildagi 34-son Qarori 11-bandiga asosan ushbu banddagi talabga javob beradigan rus tili oʻqituvchilari sertifikat olingan kundan boshlab ikki yil davomida ustama olishga haqli.

Vazirlar Mahkamasining qarori qonunosti hujjat hisoblanadi. Qonunosti hujjatlari normalariga rasmiy sharhni ularni qabul qilgan organlar beradi («Normativ-huquqiy hujjatlar toʻgʻrisida»gi Qonunning 55-moddasi). Ushbu savol bilan Vazirlar Mahkamasiga ham murojaat qilishingizni maslahat beramiz.