Ўзбекистон Республикаси Молия вазирлиги, Халқ таълими вазирлиги ва Вазирлар Маҳкамаси ҳузуридаги Хорижий тилларни ўрганишни оммалаштириш агентлигининг Вазирлар Маҳкамаси ҳузуридаги Таълим сифатини назорат қилиш давлат инспекцияси ҳамда Халқ таълими вазирлигининг С1 даражадаги миллий ёки унга тенглаштирилган мос даражадаги халқаро тан олинган сертификатга эга рус тили фани ўқитувчиларига сертификат олинган кундан бошлаб икки йил давомида қонунчилик ҳужжатларида белгиланган тартибда устама тўлаш тартибини 2022 йил 1 февралдан бошлаб жорий этиш тўғрисидаги таклифига розилик берилган (ВМнинг 19.01.2022 йилдаги 34-сон Қарори 11-банди). Бу қарорда бошқа чет тиллари ҳақида сўз бормаган.

Президентнинг 19.05.2021 йилдаги №ПҚ-5117-сон Қарори 5-банди «а»-кичик бандида бундай дейилган:

«а) таълим муассасаларининг камида С1 даражадаги миллий ёки унга тенглаштирилган мос даражадаги халқаро тан олинган сертификатга эга хорижий тиллар (инглиз, француз, немис, испан, итальян, араб, хитой, япон, корейс, турк, форс, пушту, дари, урду, ҳинд) ўқитувчиларига уларнинг базавий тариф ставкасига нисбатан ҳар ойлик 50 фоиз миқдорида қўшимча устама ҳақи тўлаб борилсин».

Қарорнинг 5-банди «в»-кичик бандида эса бундай дейилган:

«в) умумий ўрта, ўрта махсус ва профессионал таълим муассасаларида хорижий тилда мутахассислик фанларидан дарс берадиган B2 ва ундан юқори даражадаги миллий ёки унга мос даражадаги халқаро сертификатга эга ўқитувчиларига қонунчилик ҳужжатларида назарда тутилган устамалар татбиқ этилсин».

Демак, №ПҚ-5117-сон Қарорнинг «в»-кичик бандига асосан ушбу банддаги шартларга жавоб берадиган ўқитувчилар рус тилидан дарс берса ҳам устама олишга ҳақли. Ушбу бандда хорижий тиллар қатори чекланмаган.

Шу билан бирга Президентнинг 19.05.2021 йилдаги №ПҚ-5117-сон Қарори ва ВМнинг 19.01.2022 йилдаги 34-сон Қарори бир-бирига зид бўлмаган бошқа-бошқа ҳужжатлар, улар иккаласи ҳам амалда.

Эксперт фикрига кўра, ВМнинг 19.01.2022 йилдаги 34-сон Қарори 11-бандига асосан ушбу банддаги талабга жавоб берадиган рус тили ўқитувчилари сертификат олинган кундан бошлаб икки йил давомида устама олишга ҳақли.

Вазирлар Маҳкамасининг қарори қонуности ҳужжат ҳисобланади. Қонуности ҳужжатлари нормаларига расмий шарҳни уларни қабул қилган органлар беради («Норматив-ҳуқуқий ҳужжатлар тўғрисида»ги Қонуннинг 55-моддаси). Ушбу савол билан Вазирлар Маҳкамасига ҳам мурожаат қилишингизни маслаҳат берамиз.