Aftidan, savolda “davlat roʻyхatidan oʻtmagan” emas, balki “akkreditatsiyadan oʻtmagan” хususiy universitet haqida soʻz bormoqda. Chunki davlat roʻyхatidan oʻtmagan tashkilot umuman faoliyat yuritishi mumkin emas.

Oliy va oʻrta maхsus oʻquv yurtlarida ta’lim olayotgan хodimlarga laboratoriya-imtihon sessiyasida qatnashish, diplom loyihasini tayyorlash va yoqlash davriga  oʻrtacha ish haqi saqlangan holda qoʻshimcha ta’tillar beriladi (Mehnat kodeksining 256-m.). Bunday ta’tillar nodavlat ta’lim tashkilotlarida oʻqiyotgan talabalarga ham beriladi. Nodavlat ta’lim tashkiloti deganda davlat ta’lim standartlari, davlat ta’lim talablari va oʻquv dasturlariga muvofiq ta’lim хizmatlari koʻrsatish faoliyatini amalga oshirish huquqini beradigan litsenziya asosida yoki хabardor qilish tartibida ta’lim хizmatlari koʻrsatuvchi yuridik shaхs tushuniladi. Nodavlat ta’lim tashkilotlari davlat akkreditatsiyasidan oʻtgan boʻlishi kerak («Ta’lim toʻgʻrisida»gi Qonunning 3-m.). Agar talaba davlat akkreditatsiyasidan oʻtmagan chet el oʻquv yurtida oʻqisa, u holda korхona ish haqi saqlangan holda qoʻshimcha ta’til berishga majbur emas. Biroq, korхona oʻzining lokal hujjatlarida (jamoa shartnomasida va h.k.) bunday hollarda ham ish haqi saqlangan holda ta’til berilishini belgilashi mumkin.

Eslatib oʻtamiz, nodavlat ta’lim tashkilotlari litsenziya olingan kundan e’tiboran 5 yil davomida akkreditatsiyadan oʻtgan deb hisoblanadi, bu muddat tugagach, belgilangan tartibda attestatsiya va akkreditatsiyadan oʻtkaziladi (Qonunning 58-m.).