“Jismoniy va yuridik shaхslarning murojaatlari toʻgʻrisida”gi Qonunning maqsadi davlat organlari va davlat muassasalariga, shuningdek ularning mansabdor shaхslariga jismoniy va yuridik shaхslarning murojaatlari sohasidagi munosabatlarni tartibga solishdan iborat. Shuningdek, mazkur Qonunning amal qilishi davlat ishtirokidagi tashkilotlarga va fuqarolarning oʻzini oʻzi boshqarish organlariga nisbatan ham tatbiq etiladi (Qonunning 1-m.).

Shunga koʻra, mazkur Qonun MChJga nisbatan tatbiq etilmaydi va MChJ tomonidan murojaatingizga javob berilmasligi qonun buzilishi hisoblanmaydi.

Shu bilan birga, oʻziga talabnoma bildirilgan хoʻjalik yurituvchi sub’yekt talabnomani olgan kundan boshlab 15 kunlik muddat ichida unga javob qaytarishi shart (“Xoʻjalik yurituvchi sub’yektlar faoliyatining shartnomaviy-huquqiy bazasi toʻgʻrisida”gi Qonunning 18-m. 1-q.). Rad (qisman rad) javobi olingan taqdirda yoki talabnomaga belgilangan muddatda javob olinmagan taqdirda, iqtisodiy sudga da’vo arizasi berish mumkin (“Xoʻjalik yurituvchi sub’yektlar faoliyatining shartnomaviy-huquqiy bazasi toʻgʻrisida”gi Qonunning 19-m.).