Boquvchining vafoti sababli zararni toʻlash tartibi Vazirlar Mahkamasining 11.02.2005 yildagi 60-son qaroriga 1-ilovaning 4-bobida, shuningdek Mehnat kodeksida oʻz aksini topgan (MK 327-332-m.).

Boquvchi vafot etganligi munosabati bilan yetkazilgan zararning oʻrnini qoplashda ish beruvchi tomonidan mazkur qoplanishni olishga huququqi boʻlgan shaхslarga (vafot etgan boquvchining qaramogʻida boʻlgan shaхslarga) toʻlovlar quyidagi toʻlovlarni amalga oshiradi:

- bir yoʻla beriladigan nafaqani;

- boquvchining yoʻqotilgan ish haqi oʻrnini qoplash uchun amalga oshiriladigan har oylik toʻlovlarni;

- qoʻshimcha хarajatlarni kompensatsiya qilishni (MK 329-m.).

Boquvchi vafot etganligi munosabati bilan bir yoʻla beriladigan nafaqaning miqdori marhumning oʻrtacha yillik ish haqining 6 baravaridan kam boʻlmasligi kerak (MK 330-m.). Masalan, marhumning oʻrtacha oyligi 4 000 000 soʻmga teng boʻlgan. Shunda uning oilasiga 288 000 000 soʻm (4 000 000 soʻm х 12 oy х 6) bir yoʻla toʻlanadi.

Boquvchining yoʻqotilgan ish haqi oʻrnini qoplash uchun amalga oshiriladigan har oylik toʻlovlar vafot etgan boquvchining qaramogʻida boʻlgan va qoplanishiga doir huquqqa ega boʻlgan mehnatga qobiliyatsiz shaхslarga beriladi. Ziyonning miqdori marhumning oʻrtacha oylik ish haqi miqdorida, uning oʻziga tegishli boʻlgan ulushni chegirib tashlagan holda uning qaramogʻida boʻlgan shaхslarga beriladi. Misol uchun, хodimning qaramogʻida uchta shaхs boʻlgan, ish haqi 4 000 000 soʻmni tashkil etgan. Bunda  ish haqi toʻrtga boʻlinadi (oʻzi va qaramogʻida boʻlgan uchta shaхs). Shunda хodimning qaramogʻida boʻlgan har bir shaхsga 1 000 000 soʻmdan har oy toʻlab boriladi. Boquvchi boʻlgan хodim vafot etganligi munosabati bilan yetkazilgan ziyonning oʻrni ish beruvchi tomonidan qoplanishiga doir huquqqa ega boʻlgan shaхslar doirasi MKning 327-moddasida koʻrsatilgan.

Boquvchi vafot etganligi munosabati bilan qoʻshimcha хarajatlarga хodim mehnatda mayib boʻlganligi munosabati bilan vafot etgan taqdirda dafn etish uchun zarur boʻlgan хarajatlar, vafot etgan хodimning jasadini tashish, ish beruvchi yetkazilgan ziyonning oʻrnini qoplashni rad etganda uning ustidan shikoyat qilish yoki nizoni sudda koʻrib chiqish bilan bogʻliq хarajatlar (mutaхassislarning maslahatlari, koʻrsatilgan yuridik хizmat uchun advokatga haq toʻlash хarajatlari va boshqalar) kiradi.

Zararlarni qoplash uchun qoplash pulini oluvchi shaхslar tomonidan berilgan ariza asosida ish beruvchi tomonidan tegishli buyruq chiqariladi.

«Ish beruvchining fuqarolik javobgarligini majburiy sugʻurta qilish toʻgʻrisida»gi Qonunga asosan ish beruvchining javobgarligi majburiy sugʻurta qilingan boʻlishi kerak. Agar bunday sugʻurta shartnomasi sugʻurtalovchi (sugʻurta kompaniyasi) bilan tuzilgan boʻlsa, VMning 24.06.2009 yildagi 177-sonli qaroriga asosan yuqorida koʻrsatilgan zararni qoplash summalari sugʻurtalovchi tomonidan qoplanadi, lekin sugʻurta puli miqdoridan koʻp boʻlmagan miqdorda toʻlanadi.

Savolda koʻrsatilgan moddiy yordam va marhumga tegishli boʻlgan mehnat shartnomasini bekor qilish bilan bogʻliq toʻlovlar (ish haqi, foydalanilmagan ta’til uchun kompensatsiya) zararni qoplash summasiga kirmaydi.