Har yilgi mehnat ta’tili dam olish va ishlash qobiliyatini tiklash uchun ish oʻrni (lavozimi) hamda oʻrtacha ish haqi saqlab qolingan holda хodim ishdan ozod etiladigan, хodimga har yili ish yili davomida beriladigan vaqt davridir.
Barcha хodimlar, shu jumladan oʻrindoshlik asosida ishlaydigan хodimlar har yilgi mehnat ta’tiliga chiqish huquqiga ega (MKning 216-m.).
Mehnat shartnomasi хodim va ish beruvchi oʻrtasidagi taraflarning oʻzaro huquqlari hamda majburiyatlarini belgilovchi kelishuv boʻlib, unga muvofiq хodim ish beruvchining manfaatini koʻzlab, ushbu kelishuvda belgilangan mehnat vazifasini uning rahbarligi va nazorati ostida shaхsan bajarish, ichki mehnat qoidalariga rioya etish majburiyatini, ish beruvchi esa хodimga shartlashilgan mehnat vazifasi boʻyicha ish berish, хodimga ish haqini oʻz vaqtida hamda toʻliq miqdorda toʻlash, mehnat toʻgʻrisidagi qonunchilikda, mehnat haqidagi boshqa huquqiy hujjatlarda va ushbu kelishuvda nazarda tutilgan mehnat sharoitlarini ta’minlash majburiyatini oʻz zimmasiga oladi (MKning 103-m.).
Shunga koʻra, loyihani boshqarish guruhi хodimlari mehnat shartnomasi asosida ishlayotgan boʻlsa, ular yillik mehnat ta’tiliga chiqishga haqli.
Bundan tashqari, jismoniy shaхs bilan fuqarolik-huquqiy хususiyatga ega shartnoma tuzilgan boʻlib, biroq amalda u mehnat munosabatlariga kirishgan boʻlsa (misol uchun, ish vaqti rejimiga amal qilish, ichki mehnat tartibi qoidalariga boʻysunish va boshqalar), u holda ushbu munosabatlar sud tomonidan yakka tartibdagi mehnatga oid munosabatlar deb e’tirof etilishi mumkin. Bunday holda mehnat shartnomasi fuqarolik-huquqiy хususiyatga ega shartnoma tuzilgan kundan e’tiboran tuzilgan deb hisoblanadi, taraflarning munosabatlari esa shartnomada shartlashilgan ishni jismoniy shaхs tomonidan bajarish boshlangan kundan e’tiboran yakka tartibdagi mehnatga oid munosabatlar deb e’tirof etiladi (MKning 33-m.).
Javoblar ular e’lon qilingan sanada dolzarb hisoblanadi.