Ҳар йилги меҳнат таътили дам олиш ва ишлаш қобилиятини тиклаш учун иш ўрни (лавозими) ҳамда ўртача иш ҳақи сақлаб қолинган ҳолда ходим ишдан озод этиладиган, ходимга ҳар йили иш йили давомида бериладиган вақт давридир.
Барча ходимлар, шу жумладан ўриндошлик асосида ишлайдиган ходимлар ҳар йилги меҳнат таътилига чиқиш ҳуқуқига эга (МКнинг 216-м.).
Меҳнат шартномаси ходим ва иш берувчи ўртасидаги тарафларнинг ўзаро ҳуқуқлари ҳамда мажбуриятларини белгиловчи келишув бўлиб, унга мувофиқ ходим иш берувчининг манфаатини кўзлаб, ушбу келишувда белгиланган меҳнат вазифасини унинг раҳбарлиги ва назорати остида шахсан бажариш, ички меҳнат қоидаларига риоя этиш мажбуриятини, иш берувчи эса ходимга шартлашилган меҳнат вазифаси бўйича иш бериш, ходимга иш ҳақини ўз вақтида ҳамда тўлиқ миқдорда тўлаш, меҳнат тўғрисидаги қонунчиликда, меҳнат ҳақидаги бошқа ҳуқуқий ҳужжатларда ва ушбу келишувда назарда тутилган меҳнат шароитларини таъминлаш мажбуриятини ўз зиммасига олади (МКнинг 103-м.).
Шунга кўра, лойиҳани бошқариш гуруҳи ходимлари меҳнат шартномаси асосида ишлаётган бўлса, улар йиллик меҳнат таътилига чиқишга ҳақли.
Бундан ташқари, жисмоний шахс билан фуқаролик-ҳуқуқий хусусиятга эга шартнома тузилган бўлиб, бироқ амалда у меҳнат муносабатларига киришган бўлса (мисол учун, иш вақти режимига амал қилиш, ички меҳнат тартиби қоидаларига бўйсуниш ва бошқалар), у ҳолда ушбу муносабатлар суд томонидан якка тартибдаги меҳнатга оид муносабатлар деб эътироф этилиши мумкин. Бундай ҳолда меҳнат шартномаси фуқаролик-ҳуқуқий хусусиятга эга шартнома тузилган кундан эътиборан тузилган деб ҳисобланади, тарафларнинг муносабатлари эса шартномада шартлашилган ишни жисмоний шахс томонидан бажариш бошланган кундан эътиборан якка тартибдаги меҳнатга оид муносабатлар деб эътироф этилади (МКнинг 33-м.).
Жавоблар улар эълон қилинган санада долзарб ҳисобланади.