Smenada ishlaydigan хodimlarga boshqalar kabi ish haqi toʻlanadi. Agar ishlab chiqarish (ish) sharoitlariga koʻra ish beruvchida ushbu toifadagi хodimlar uchun belgilangan ish vaqtining kunlik yoki haftalik davomiyligiga (40 soat) rioya etish imkoni boʻlmasa, ish vaqtini jamlab hisobga olishni joriy etishga yoʻl qoʻyiladi.  Ish vaqtini jamlab hisobga olish joriy etilganda bunday хodimlarga hisobga olish davri oʻrnatiladi. Hisobga olish davri uchun ish vaqtining davomiyligi ish soatlari normasidan oshmasa, ish vaqtini jamlab hisobga olish joriy etilishi mumkin. Bunda hisobga olish davri 12 oydan, kunlik ishning (smenaning) davomiyligi esa 12 soatdan oshmasligi kerak (MK 199-m.). Ish vaqti jamlab hisobga olinganda hisobga olish davri uchun хodimga belgilangan ish vaqtining davomiyligidan tashqari ish ish vaqtidan tashqari ish deb hisoblanadi (MK 189-m.). Ish vaqtidan tashqari ish uchun kamida 2 hissa miqdorida haq toʻlanadi (MK 262-m.). Shuningdek tungi vaqtdagi mehnat uchun haq toʻlash kamida 1,5 baravar miqdorida amalga oshiriladi (MK 264-m.). Soat 22-00 dan 6-00 gacha boʻlgan vaqt tungi vaqt hisoblanadi (MK 188-m.).

Smenali ishda ishlayotgan хodimning ish haqini quyidagi misolda hisoblaymiz:

Xodimning ish haqi - 2 000 000 soʻm. Noyabr oyida ish vaqti me’yori (normasi) 176 soat etib belgilangan (Mehnat vazirligi 23.12.2022 y. N 01/00-05/12-11700). Noyabr oyida grafik boʻyicha 15 smena, har biri 12 soatdan, jami 180 soat ishlab bergan. Bundan 56 soati tungi vaqtga toʻgʻri kelgan. Shuningdek хodim 4 soat ish vaqtidan tashqari ishlab bergan. Xodimning har bir ishlab bergan soati uchun ish haqi 11 363 soʻmga (2 000 000 : 176) toʻgʻri keladi. Har bir tungi soati uchun 17 044,5 soʻm (11 363 х 1,5) toʻlanadi. Har bir ish vaqtidan tashqari ishlab bergan soati uchun 22 726 soʻm (11 363 х 2) toʻlanadi. Shunda noyabr uchun ish haqi 2 454 408 soʻmni tashkil etadi: 

1 409 012 soʻm (124 х 11 363) ish vaqtidagi soatlar uchun;

954 492 soʻm (56 х 17 044,5) tungi soatlar uchun;

90 904 soʻm (4 х 22 726) ish vaqtidan tashqari soatlar uchun.