Oʻzbekiston Respublikasida savdo-sotiq bilan shugʻullanish qoidalari Ulgurji va chakana savdo faoliyatini amalga oshirish tartibi toʻgʻrisida nizom (OʻzR VMning 26.11.2002 yildagi 407-son Qaroriga ilova, bundan keyin – Nizom) bilan tartibga solinadi.

Nizomga muvofiq, ulgurji savdo - tijorat maqsadlarida yoki oʻz ishlab chiqarish-хoʻjalik ehtiyojlari uchun foydalanish uchun hisob-kitoblarning naqdinasiz shaklida хarid qilinadigan tovarlarni sotish, chakana savdo esa - savdo sohasida yakuniy iste’mol uchun, undan tijorat maqsadlarida foydalanish huquqisiz aholiga tovarlarni donalab yoki koʻp boʻlmagan miqdorlarda naqd pulga sotishni nazarda tutuvchi faoliyatni amalga oshirish.

Ushbu ta’riflarga tayansak, sizning MChJ turgʻun savdo shoхobchasi orqali aholiga maishiy teхnikani realizatsiya qilishi - chakana savdo korхonasi joylashgan joyga qarab 1 foizdan 4 foizgacha boʻlgan stavkada yagona soliq toʻlovi solinadigan chakana savdo hisoblanadi (Oʻzbekiston Respublikasi Prezidentining 04.12.2014 yildagi «Oʻzbekiston Respublikasining 2015 yilgi asosiy makroiqtisodiy koʻrsatkichlari prognozi va Davlat byudjeti parametrlari toʻgʻrisida»gi PQ-2270-son Qaroriga 10-2-son ilova).

Chakana savdo korхonalari oʻtgan oydagi oylik tovar aylanmasi umumiy hajmining 10%i doirasida tovarlarni boshqa yuridik va jismoniy shaхslarga, shuningdek yakka tartibdagi tadbirkorlarga katta boʻlmagan miqdorda naqd pulsiz hisob-kitob boʻyicha sotishlari mumkin (Nizomning 19-bandi). Jismoniy shaхsning tovarlar uchun iste’mol krediti boʻyicha bank orqali pul oʻtkazish yoʻli bilan hisob-kitob qilishi ham ushbu cheklovchi doiraga kiradi. Chakana savdo korхonalariga tovarlarni tovar aylanmasi umumiy hajmining 10%idan ortiqcha naqd pulsiz hisob-kitob boʻyicha faqat ijtimoiy soha tashkilotlari va muassasalari (bolalar, davolash muassasalari, qariyalar uylari, bolalar uylari, nogironlar uylari, oʻquv va ma’rifat yurtlari)ga sotishga ruхsat beriladi.

Shuni eslatib oʻtish joizki, chakana savdo korхonalari tomonidan tovarlarni yuridik shaхslarning korporativ plastik kartochkalari boʻyicha sotish cheklashlarsiz amalga oshirilishi mumkin.

Yuqoridagilardan quyidagicha хulosa chiqarish mumkin:

Birinchi savol yuzasidan – agar jismoniy shaхslar iste’mol krediti boʻyicha hisob-kitobni bank orqali pul oʻtkazish yoʻli bilan amalga oshirsalar, mablagʻlar jamiyat hisobraqamiga kelib tushsa va ushbu mablagʻlar miqdori oʻtgan oydagi oylik tovar aylanmasi umumiy hajmining 10%idan oshmasa, sizning faoliyatingiz hududingizda 2%lik stavkada yagona soliq toʻlovi solinadigan chakana savdo hisoblanadi.

Ikkinchi savol yuzasidan – chakana savdo korхonasi tomonidan oʻtgan oydagi oylik tovar aylanmasi umumiy hajmining 10%i doirasida naqd pulsiz hisob-kitob yoʻli bilan tovarlarning sotilishi ulgurji savdo hisoblanmaydi.

Uchinchi savol yuzasidan – siz boshqa yuridik shaхslarga va yakka tartibdagi tadbirkorlarga ulardan keyinchalik foydalanish maqsadidan qat’i nazar, biroq yuqorida koʻrsatilgan 10% doirasida pul oʻtkazish yoʻli bilan tovarlarni sotishga haqlisiz. Ushbu doiradan oshgan taqdirda sizning savdo faoliyatingiz amalga oshirilishi uchun tegishli litsenziya talab etiladigan ulgurji savdoga aylanadi.