Ijodiy ta’tillar berish va ularning muddati VMning 11.03.1997 yildagi 133-son qaroriga 7-ilovada belgilangan.

Ijodiy ta’tillar asosiy ish joylaridagi oʻrtacha oylik ish haqlari va lavozimlari saqlangan holda beriladi.

Oʻrtacha oylik ish haqini hisoblash tartibi VMning 11.03.1997 yildagi 133-son qaroriga 6-ilovaning 1-bandiga asosan  belgilanadi.

Oʻrtacha oylik ish haqi hisoblab chiqarish kunidagi tarifikatsiya boʻyicha belgilangan ish haqi yoki lavozim maoshidan kelib chiqqan holda tarifikatsiya boʻyicha ish haqi yoki lavozim maoshidan oshgan summani oʻn ikkidan birga (birinchi yil ishlovchilarga: olti oy toʻliq ishlaganlarga oltidan birga; yetti oy toʻliq ishlaganlarga yettidan birga va hokazolar) oshirgan holda hisoblab chiqariladi.

Oʻrtacha ish haqini hisoblashda SKning 172-moddasiga binoan yagona ijtimoiy toʻlov va sugʻurta badallari solinadigan fuqarolarning mehnatga haq toʻlash tarzidagi daromadlari hisobga olinadi.

Oʻrtacha kunlik ish haqi oʻrtacha oylik ish haqini 25,4 ga boʻlish bilan aniqlanadi;

Ta’til puli summasi oʻrtacha kunlik ish haqini ta’tilning ish kunlariga koʻpaytirish bilan hisoblanadi.

Daromadlarning bu turi jismoniy shaхslardan olinadigan daromad soligʻiga tortiladi, ulardan majburiy sugʻurta badallari ushlab qolinadi va yagona ijtimoiy toʻlov solinadi.

Hisoblab yozilgan summadan 1 foiz miqdorida ajratma byudjetga toʻlanadigan jismoniy shaхslardan olinadigan  daromad soligʻi summasi hisobidan хodimlarning shaхsiy jamgʻarib boriladigan pensiya hisobvaraqlariga (ShJBPH) oʻtkaziladi.