2011 yil 1 yanvardan boshlab хodimning pensiya yoshiga toʻlganligi, qonun hujjatlariga muvofiq yoshga doir davlat pensiyasini olish huquqi mavjud boʻlganda qonunchilikka muvofiq u bilan mehnat shartnomasini ish beruvchining tashabbusi bilan asoslangan bekor qilish uchun sabab boʻlib hisoblanadi (Mehnat kodeksining 100-moddasi ikkinchi qismining 7-bandi). Biroq aniqlashtirib olamizki, bu ish beruvchiga faqat huquq beradi, ammo uni barcha pensioner хodimlar bilan mehnat shartnomalarini  bekor qilishga majbur etmaydi.

Ish beruvchi mehnat shartnomasini bekor qilish niyati haqida pensiya yoshiga toʻlgan хodimni kamida 2 oy oldin yozma ravishda (imzo chektirib) ogohlantirishi shart (MKning 102-moddasi birinchi qismining 1-bandi).  

Xodim va ish beruvchi oʻrtasidagi kelishuvga asosan ogohlantirish ogohlantirish muddatiga mos keladigan pul kompensatsiyasi bilan almashtirilishi mumkin.

Ogohlantirish muddati mobaynida хodim haftada kamida 1 kun ish haqi saqlangan holda ishga chiqmasligi mumkin – bu vaqt boshqa ish qidirish uchun. Bu muddatga vaqtincha mehnatga qobiliyatsizlik davri, shuningdek uning davlat yoki jamoat vazifalarini bajargan vaqti qoʻshilmaydi.

Basharti jamoa kelishuvi yoki jamoa shartnomasida mehnat shartnomasini ish beruvchining tashabbusi bilan bekor qilish uchun kasaba uyushmasi qoʻmitasi yoki хodimlar boshqa vakillik organining oldindan roziligini olish nazarda tutilgan boʻlsa, ish beruvchi ularning roziligini olishi zarur (MKning 101-moddasi).