2013 yil 1 sentyabrdan boshlab chet tillar, хorijiy filologiya, chet tili va tarjima yoʻnalishlarining kasbiy va maхsus fanlari professor-oʻqituvchilari va oʻqituvchilarining lavozim maoshlariga oylik ustamalar belgilangan (Vazirlar Mahkamasining “Xalq ta’limi хodimlari mehnatiga haq toʻlash shartlarini tartibga solish toʻgʻrisida” 29.09.1994 yildagi 490-son qaroriga 3-ilova). Ular:

qishloq joylarda joylashgan ta’lim muassasalarida – 30%;

qolgan ta’lim muassasalarida – 15%ni tashkil qiladi.

Ularni amalga oshirish uchun quyidagi shartlar majburiydir:

asosiy ishidan ajralgan holda kamida 144 soat davom etadigan dastur boʻyicha malaka oshirish;

tegishli ta’lim muassasasida pedagogik faoliyat olib borish uchun zarur malaka va chet tilini bilishni aniqlash boʻyicha Davlat test markazi tomonidan oʻtkaziladigan test sinovlaridan oʻtish (Chet tillar oʻqituvchilarining bazaviy lavozim maoshlariga oylik ustama belgilash uchun test sinovlarini oʻtkazish tartibi toʻgʻrisidagi Nizom). Lavozim maoshiga oylik ustama olish huquqini beruvchi test sinovidan kalendar yil mobaynida qatorasiga 2 marta oʻtmagan oʻqituvchilar kelgusi oʻquv yilidan boshlab oʻz mablagʻlari hisobidan malaka oshirish kurslaridan oʻtmagunlariga qadar chet tili boʻyicha oʻqituvchilik faoliyatiga qoʻyilmaydilar (Vazirlar Mahkamasining 2015 yil 25 martdagi 67-son "Umumta’lim muassasalarining chet tillar oʻqituvchilari malakasini va kasb mahoratini oshirishga doir qoʻshimcha chora-tadbirlar toʻgʻrisida"gi qarorining 3-bandi);

malaka oshirish toʻgʻrisidagi davlat namunasidagi sertifikat mavjudligi.

Test sinovlaridan oʻtishga tayyorlash maqsadida chet tillar oʻqituvchilari uchun 144 soatlik kurslarga qoʻshimcha ravishda OʻzR VMning 23.03.2015 yildagi 67-son qarori bilan tasdiqlangan Umumta’lim muassasalarining chet tillar oʻqituvchilari kasb mahoratini oshirish har haftalik kurslarini oʻtkazish tartibi toʻgʻrisida Nizomda koʻzda tutilgan tartibda kasbiy mahoratni oshirishning doimiy ishlaydigan har haftalik kurslari tashkil etiladi.