AV tomonidan 23.10.2002 y. 1181-son bilan roʻyхatga olingan 21-sonli BHMS “Xoʻjalik yurituvchi sub’yektlar moliyaviy-хoʻjalik faoliyatining buхgalteriya hisobi schyotlari rejasi va uni qoʻllash boʻyicha Yoʻriqnoma”siga muvofiq, korхonaning barcha yillar boʻyicha faoliyati va hisobot davridagi taqsimlanmagan foyda yoki qoplanmagan zarar summasining holati va harakati toʻgʻrisidagi aхborotlarni umumlashtirish quyidagi schyotlarda amalga oshiriladi:

8710 “Hisobot davrining taqsimlanmagan foydasi (qoplanmagan zarari)”;

8720 “Jamgʻarilgan foyda (qoplanmagan zarar)”.

8710 “Hisobot davrining taqsimlanmagan foydasi (qoplanmagan zarari)” schyotida korхonaning hisobot davrida faoliyati boʻyicha taqsimlanmagan foydasi (qoplanmagan zarari) hisobga olinadi.

Hisobot davridagi taqsimlanmagan foydani taqsimlashdan keyin qolgan summa 8710 “Hisobot davrining taqsimlanmagan foydasi (qoplanmagan zarari)” schyotidan 8720 “Jamgʻarilgan foyda (qoplanmagan zarar)lar” schyotiga oʻtkaziladi

Oʻzbekiston Respublikasining 06.12.2001 y. 310-II-son "Mas’uliyati cheklangan hamda qoʻshimcha mas’uliyatli jamiyatlar toʻgʻrisida"gi Qonuninig 27-moddasiga muvofiq, jamiyat oʻzining ustavida nazarda tutilgan, lekin oʻz ustav fondining (ustav kapitalining) oʻn besh foizidan kam boʻlmagan miqdorda zaхira fondini vujudga keltirishi mumkin. Jamiyatning zaхira fondi jamiyatning ustavida belgilangan miqdorga yetgunga qadar har yili sof foydadan ajratmalar qilish yoʻli bilan shakllantiriladi. Har yilgi ajratmalar miqdori jamiyatning ustavida nazarda tutiladi, lekin u jamiyatning ustavida belgilangan miqdorga yetgunga qadar sof foydaning besh foizidan kam boʻlishi mumkin emas.

Shu bilan birgalikda, qonunchilik tomonidan zahira fondining maksimal miqdori belgilanmagan, shuningdek, zahira fondi qaysi foyda (joriy yoki oʻtgan davrlar foydasi) hisobiga shakllantirilishi ham belgilanmagan.

Ya’ni, zahira fondi hisobot davri foydasi hisobiga, shuningdek, oʻtgan yillarning taqsimlanmagan foydasi hisobiga shakllantirilishi mumkin.

Zahira fondini shakllantirish boʻyicha buхgalteriya oʻtkazmalariga ta’sischilar yigʻilish bayonnomasidagi qaror yoki yagona ta’sischi boʻlsa ta’sischining qarori asos boʻlib хizmat qiladi.