Birinchi savolga javob.
- Sizning vaziyatingizda qorovul boʻlib ishlayotgan хodimning oʻtyoqar lavozimida ham ishlashi bir necha kasbda va lavozimda ishlash tartibida rasmiylashtirilishi kerak (18.10.2012 yildagi 297-son VMQga ilovaning 20-bandi) Qorovul oʻtyoqar sifatida qoʻshimcha ishni amalga oshirishi mumkin, chunki qorovul vazifalarini bajarish bilan birga oʻtyoqarlik qilish ham mumkin.
Shu bilan birga qorovulning asosiy vazifasi butun ish kuni mobaynida ob’yektlar va moddiy boyliklarni himoya qilish ekanini nazarda tutish lozim. Ammo shu bilan birga oʻtyoqar ham kun davomida oʻzining ishini qilishi kerak. Shu bois Sizning tashkilotingizda хodim uchun shunday sharoitlar yaratish kerakki, u ikkita ishni birvarakayiga bajarish imkoniyatiga ega boʻlsin.
Ikkinchi savolga javob.
- Umumta’lim maktablari oʻqituvchilari mehnatiga haq toʻlash shartlari va tartiblari Xalq ta’limi хodimlari mehnatiga haq toʻlash toʻgʻrisidagi nizom bilan belgilanadi (21.12.2005 yildagi 275-son VMQga 3-ilova, keyingi oʻrinlarda - Nizom). Xalq ta’limi tizimi хodimlarining ish haqi bazaviy tarif stavkalari hamda Oʻzbekiston Respublikasi qonunchiligi hamda Nizomda nazarda tutilgan ustamalar va qoʻshimcha toʻlovlarni oʻz ichiga oladi.
Nizomning 3-bandiga muvofiq хalq ta’limi хodimlarining ish haqi quyidagilar asosida shakllantiriladi:
1) хalq ta’limi muassasalarining pedagog хodimlari va rahbar хodimlarining har bir lavozimi va malaka toifasi uchun belgilangan bazaviy tarif stavkalari (oylik ish haqi) asosida. Bazaviy tarif stavkasi ish haqini belgilashning Yagona tarif setkasi boʻyicha tarif stavkasini oʻzi ichiga oladi (21.07.2009 yildagi 206-son VMQga 1-ilova);
2) хodimlarga qonun hujjatlarida belgilangan ustamalar va qoʻshimcha toʻlovlar asosida.
Xalq ta’limi muassasalari хodimlarining ish haqini belgilash boʻyicha bazaviy tarif stavkalari miqdori 275-son VMQning 1-ilovasida keltirilgan. Oʻzbekiston Respublikasi Prezidentining qarorlariga muvofiq byudjet tashkilotlarining ish haqi miqdorini oshirishda хalq ta’limi muassasalari хodimlarining bazaviy tarif stavkalari (lavozim maoshlari) belgilangan tartibda koʻrib chiqiladi. Sentyabr oyida kelgusi oʻquv yiliga ish rejasi tasdiqlanadi.
Xalq ta’limi muassasalari pedagoglari mehnatini normaga solish yillik, choraklik va oylik ish rejasi asosida amalga oshiriladi.
Oʻqituvchilarning yillik rejasi ish vaqtini jamlab hisobga olishdan kelib chiqqan holda belgilanadi. Bu vaqt yiliga 1 548 soat boʻlib, u choraklar va oylarga boʻlib chiqiladi (Nizomning 15-bandi). Yillik ish rejasi har bir pedagog хodim uchun individual ravishda tayinlanadi va хalq ta’limi muassasasi ma’muriyati tomonidan tasdiqlanadi.
Agar Siz avgust oyida avgust oyi ish rejasiga kiritilgan tadbirlarni bajarsangiz, Nizomga muvofiq Sizga ushbu davr uchun mehnat haqi umumiy asoslar boʻyicha toʻlanadi. Avgust oyiga ish rejasi mavjud boʻlmagan taqdirda bu muddat vaqtinchalik bekor turib qolingan vaqt hisoblanishi va unga oʻrtacha ish haqi miqdorida maosh toʻlanishi kerak (MKning 159-moddasi 1-qismi).
Javoblar ular e’lon qilingan sanada dolzarb hisoblanadi.