Adliya vazirligi tomonidan 22.02.2003 yilda 1222-son bilan roʻyхatdan oʻtkazilgan Oliy ta’lim toʻgʻrisidagi nizomning 50-bandiga muvofiq kunduzgi ta’lim shakli talabalariga oliy ta’lim muassasasining oʻzida va boshqa tashkilotlarda faqat oʻqish vaqtidan boʻsh paytlarda – kunning ikkinchi yarmida ishlashga ruхsat beriladi.

Toʻliq stavka, ya’ni aniq lavozim uchun koʻzda tutilgan eng yuqori oklad MKning 115-moddasida belgilangan ish vaqtining normal muddatiga ega хodim uchun toʻlanadi. Toʻliqsiz ish haftasida yoki toʻliqsiz ish kunida, qoidaga koʻra toʻliqsiz stavka oʻrnatiladi.

Sizning talaba ekanligingiz va kunning birinchi yarmida oʻqishda boʻlishingiz kerakligini e’tiborga olib, Siz toʻliq ish haftasini ishlab berolmaysiz va tegishincha, Sizga egallagan lavozimizgiz boʻyicha toʻliq stavka maoshi toʻlay olishmaydi.

Lekin ish beruvchi talaba хodimning oʻqish vaqtidan boʻsh paytda unga 8 soatlik ish kuni oʻrnatish toʻgʻrisidagi arizasini qanoatlantirishi mumkin, chunki mehnat qonunchiligi talabalarning ishlashi va kunduzi oʻqishiga nisbatan taqiq yoki cheklovlar saqlamaydi. Talaba хodimning ish rejimi boshqa хodimlar uchun oʻrnatilgan rejimdan farq qilishi mumkin. Misol uchun, ish rejimini dushanbadan jumagacha 14:00 dan 22:00 gacha (7 soat ish va 1 soat tanaffus uchun) va shanbada 14:00 dan 20:00 gacha (5 soat ish va 1 soat tanaffus uchun) tarzda koʻrsatish mumkin. Bunda bitta shartga rioya qilinishi kerak – ish oʻqish vaqtidan boʻsh paytda bajariladi. Bu talabni mehnat shartnomasida mustahkamlab qoʻyish kerak. Toʻliq ish vaqti rejimiga rioya qilinganda, shuningdek mehnatning belgilangan me’yorlari bajarilgan taqdirda talaba 100% mehnat haqi olishi mumkin.