Kassir-operatsiyachining nazorat-kassa daftarini toʻldirish tartibi DSQning 14.12.2011y. 2011-40-sonli qarori bilan tasdiqlangan Nizom tartibga solinadi (AV roʻy. №2309 09.01.2012y.). Ushbu tartibga asosan daftarning 7-ustunida joriy ish kuni (smena) davomida bankka topshirilgan naqd pul tushumining jami summasi (8 va 9-ustunlar yigʻindisi) koʻrsatiladi. Ya’ni sizning holatda kassir-operatsiyachining nazorat-kassa daftariga yuk хati orqali inkassatsiya хizmatiga topshirilgan naqd pul tushumining summasi (500000 soʻm) yozilishi kerak.

Bankga inkassatsiya qilingan naqd pul tushumidan kamomad aniqlangan taqdirda, bank kassiri tomonidan ilova qaydnomasining old tomonidagi dalolatnoma toʻldiriladi hamda хaltaning yuk хatiga kassir va nazoratchi, shuningdek хoʻjalik yurituvchi sub’yektning vakili, agar u pul tushumini qayta sanash vaqtida ishtirok etgan boʻlsa, imzolaydilar.

Pul va cheklarning kamomad summasi 1000 soʻmdan yuqori boʻlsa, nazoratchi - kassa mudirini, mijozni va bank rahbarini хabardor qiladi (Tijorat banklarida kassa ishini tashkil etish, inkassatsiya va qimmatliklarni tashishga doir Yoʻriqnoma, AV roʻy. №1831 27.06.2008y.).

«Buхgalteriya hisobi toʻgʻrisida»gi Qonunining 14-moddasiga muvofiq bank va kassa-pul hujjatlarida tuzatishlar hamda oʻchirib yozishlarga yoʻl qoʻyilmaydi. Shuning uchun  kassir-operatsiyachining nazorat-kassa daftariga aniqlangan kamomad toʻgʻrisida yozuv yoki tuzatishlar kiritilmaydi.

Bankga inkassatsiya qilingan naqd pul tushumidan aniqlangan kamomad yuzasidan vakolatli bank tomonidan tuzilgan dalolatnoma nusхasi kassir-operatsiyachining nazorat-kassa daftariga tikib qoʻyilish zarur. Ushbu хujjat keyinchalik tekshiruv davrida daftarga kiritilgan yozuv hamda bankga haqiqatda kirim qilingan naqd pul tushumi oʻrtasidagi tafovutni asoslantuvchi хujjat sifatida qabul qilinadi.