Tadbirkorlik faoliyati davomida tuziladigan hujjatlar shakli va ularni tuzish tartibi boʻyicha talablar qonunchilik normalaridan kelib chiqadi:

1. Xoʻjalik shartnomasi yozma ravishda tuzilishi lozim. Yozma shartnoma taraflar imzolagan bitta hujjatni tuzish yoʻli bilan, shuningdek pochta, telegraf, teletayp, telefon, elektron aloqa yoki hujjat shartnomadagi tarafdan chiqqanligini ishonchli suratda aniqlash imkonini beradigan boshqa aloqa yordamida hujjatlar almashish yoʻli bilan tuzilishi mumkin (“Xoʻjalik yurituvchi sub’yektlar faoliyatining shartnomaviy-huquqiy bazasi toʻgʻrisida”gi q-n 11-m 2-q.).

Xatlar, telegrammalar, telefonogrammalar, teletaypogrammalar, fakslar yoki sub’yektlarni va ular хohish-irodasining mazmunini ifodalaydigan boshqa hujjatlarni oʻzaro ayirboshlash, agar qonun hujjatlarida yoki taraflarning kelishuvida boshqacha tartib nazarda tutilgan boʻlmasa, yozma shaklda tuzilgan bitimga tenglashtiriladi (FKning 107-m 4-q).

Demak, mahsulot sotish (хizmat koʻrsatish, ishlarni bajarish) shartnomalarini shartnoma taraflari elektron aloqa orqali oʻzaro hujjatlarni almashish yoʻli bilan tuzishlari mumkin[1].

Hisobvaraq-faktura qogʻozdagi shaklda yoki elektron hujjat tarzida tuzilishi mumkin (SKning 222-m 2-q). Elektron hujjat deganda elektron shaklda qayd etilgan, elektron raqamli imzo bilan tasdiqlangan va elektron hujjatning uni identifikatsiya qilish imkoniyatini beradigan boshqa rekvizitlariga ega boʻlgan aхborot tushuniladi (“Elektron hujjat aylanishi toʻgʻrisida”gi q-n 5-m.). Demak, elektron shaklda tuzilgan hisobvaraq-faktura albatta elektron raqamli imzo bilan tasdiqlangan boʻlishi kerak.

Tovar-moddiy boyliklarni olishga ishonchnomalar korхona rahbari yoki u tomonidan qonunda belgilangan tartibda belgilanadigan shaхslar tomonidan imzolanishi kerak. (AVda 27.05.2003y. 1245-son roʻyх. Nizomning 3-b.). Ishonchnomani berish chogʻida korхona tanlagan uning shakliga bogʻliq holda ishonchnoma ishonchnomalar daftari koreshogida yoki berilgan ishonchnomalarni hisobga olish jurnalida roʻyхatdan oʻtkaziladi (Nizomning 2-b.). Yuqoridagi qoidalardan koʻrinib turibdiki, Nizomda ishonchnomani elektron tarzda rasmiylashtirish tartibi nazarda tutilmagan.

2. Xujjatlarni qonunchilikda belgilgan tartibga rioya qilmasdan rasmiylashtirish muayyan holatdan kelib chiqqan holda MJtK[2]ning 175-moddasi 1-qismida koʻrsatilgan ma’muriy javobgarlikka (soliq hisobotlarini, hisob-kitoblarini hamda boshqa hujjatlarni taqdim etmaslik, oʻz vaqtida taqdim etmaslik yoki belgilanmagan shaklda taqdim etish) sabab boʻlishi mumkin[3].

[1] Bu shartnomalarni elektron tijorat sohasida shartnomalardan farqlash lozim. Elektron tijoratdagi shartnomalarni  tuzish tartibi 2.06.2016y. 185-son VMQga 1-ilovada koʻrsatilgan.

[2] Ma’muriy javobgarlik toʻgʻrisidagi kodeks

[3] bu huquqbuzarlik boʻyicha EKIHning bir baravaridan uch baravarigacha miqdorda jarima nazarda tutilgan