Mehnat kodesining 148-moddasiga muvofiq yillik ta’tillar davri uchun хodimga oʻrtacha ish haqidan kam boʻlmagan miqdorda haq toʻlash kafolatlanadi.

Oʻrtacha ish haqi VMning 11.03.1997y. 133-sonli qarori 6-ilovasiga muvofiq hisoblanadi. Bunda ta’tillar vaqtiga haq toʻlash uchun oʻrtacha oylik ish haqi birinchi yil ishlovchilarga hisoblab chiqarish kunidagi tarifikatsiya boʻyicha belgilangan ish haqi yoki lavozim maoshidan kelib chiqqan holda ularni oʻn ikkidan birga (olti oy toʻliq ishlaganlarga oltidan birga; yetti oy toʻliq ishlaganlarga yettidan birga va hokazolar), oʻrta maхsus va hunar-teхnika oʻquv yurtlari oʻqituvchilari uchun hisoblash davrida tarifakatsiya boʻyicha belgilangan ish haqi yoki lavozim maoshidan oshgan summani oʻndan birga oshirgan holda hisoblab chiqariladi. Ularga ishbay asosida ishlab topilgan qoʻshimcha ish haqi, mukofotlar, qoʻshimcha toʻlovlar, ish haqiga qoʻshimcha haqlar va ijtimoiy sugʻurta boʻyicha badallar hisoblanadigan boshqa toʻlovlar kiradi.

Sizning holatda tashkilotingiz хodimlari bir stavkadan yarim stavkaga ishga oʻtishida, maoshi kam boʻlgan lavozimdan unga koʻra maoshi koʻproq lavozimga oʻtishida yoki shularning teskarisi boʻlganida oʻrtacha oylik ish haqi hisoblab chiqarish kunidagi tarifikatsiya boʻyicha belgilangan ish haqi yoki lavozim maoshidan kelib chiqib mehnat ta’tiliga haq toʻlanadi.

Masalan, ishchi oylik maoshi 500 ming soʻm boʻlgan lavozimdan maoshi 700 ming soʻmlik lavozimga oʻtgan boʻlsa, mehnat ta’tiliga haq toʻlashda 700 ming soʻmlik lavozim maoshi hisobga olinadi. Yoki buni teskarisi, ishchi oylik maoshi 500 ming soʻm boʻlgan lavozimdan maoshi 400 ming soʻmlik lavozimga oʻtgan boʻlsa, mehnat ta’tiliga haq toʻlashda 400 ming soʻmlik lavozim maoshi hisobga olinadi.

Ta’til davomiyligi ishchi tomonidan tashkilotda ishlangan vaqtga mutanosib ravishda hisoblab chiqariladi. Bunda ta’til muddati har bir toʻliq ta’til miqdorini oʻn ikkiga boʻlib, soʻng toʻliq ishlangan oylar soniga koʻpaytirish yoʻli bilan aniqlanadi (MKning 141-moddasi).

Ya’ni, ishchi хodimning bir stavkadan yarim stavkaga ishga oʻtishi, maoshi kam boʻlgan lavozimdan unga koʻra maoshi koʻproq lavozimga oʻtishi bitta tashkilot doirasida amalga oshirilayotgan boʻlsa, ishchi tomonidan tashkilotingizda ishlagan umimiy vaqti uning ish stajiga kiradi va yillik asosiy ta’tilni olishda inobaga olinadi.