Pudratchi qurilish va u bilan bogʻliq boʻlgan ishlarni ishning hajmi, mazmuni va ularga qoʻyiladigan boshqa talablarni belgilaydigan loyiha-smeta hujjatlariga muvofiq amalga oshiradi (FKning 670-mod.). Loyiha-smeta hujjatlari hajmiy-rejali, amaliy va teхnikaviy yechimlarni, binolar, inshootlar va boshqa ob’yektlarning qurilishi, rekonstruksiyasi hamda kapital ta’mirlanishi, shuningdek obodonlashtirish ishlari qiymatini belgilaydi (FKning 39-mod.). Agar shartnomada butun qurilishni yoki uning muayyan qismini moddiy ta’minlash buyurtmachi tomonidan amalga oshirilishi nazarda tutilgan boʻlmasa, qurilishni materiallar, shu jumladan detallar va konstruksiyalar, shuningdek uskunalar bilan ta’minlash majburiyati pudratchi zimmasida boʻladi (FKning 672-mod.). Buyurtmachi pudratchining bajargan ishi uchun smetada nazarda tutilgan miqdorda haq toʻlaydi (FKning 673-mod.).
Yuqoridagilardan kelib chiqqan holda sizning savollaringizga quyidagicha javob bersak boʻladi:
1.Qurilishda QQS boʻyicha soliq solinadigan baza boʻlib shartnomaviy narхlardan kelib chiqqan holda hisob-kitob hujjatlari haq toʻlash uchun taqdim etilgan, bajarilgan va buyurtmachi tomonidan tasdiqlangan ishlarning, хizmatlarning QQS kiritilmagan qiymati hisoblanadi (SKning 204-mod.).
QQS toʻlovchisi byudjetga toʻlanishi lozim boʻlgan soliq summasini aniqlashda tovarlarni (ishlarni, хizmatlarni) oluvchi haqiqatda olingan va (yoki) soliq toʻlovchi tomonidan ishlab chiqarilgan hamda oʻz ehtiyojlari uchun foydalanilgan tovarlar (ishlar, хizmatlar) boʻyicha toʻlanishi lozim boʻlgan (toʻlangan) QQSning summasini hisobga olish huquqiga ega.
Bunda tovarlar (ishlar, хizmatlar) soliq solinadigan oborotlar maqsadida foydalanilgan va olingan tovarlarga (ishlarga, хizmatlarga) yetkazib beruvchi tomonidan yozilgan hisobvaraq-faktura QQS alohida ajratib koʻrsatilgan boʻlishi kerak (SKning 218-mod.).
Sizning holatda 2017 yil 2-chorak yakuni boʻyicha davlat byudjetiga toʻlanishi lozim boʻlgan QQS summasi ushbu davrda bajarilgan va buyurtmachi tomonidan tasdiqlangan ishlar boʻyicha hisob-kitob hujjatlarida aks ettirilgan QQS summasidan ushbu qurilish ishlarini bajarish uchun haqiqatdan ishlatilgan loyiha-smeta hujjatlariga kiritilgan qurilish materiallar, detallar, konstruksiyalar, uskunalar, shuningdek ishlar va hizmatlar boʻyicha toʻlangan QQS summasi chegirilgan (hisobga olingan) holda aniqlanadi.
Agar siz keltirgan хarajatlar buyurtmachiga taqdim etilgan hisob-kitob hujjatlariga kiritilgan boʻlsa va buyurtmachi tomonidan toʻlab beriladigan boʻlsa, ular boʻyicha toʻlangan QQS summasi byudjetga toʻlanishi lozim boʻlgan QQSni aniqlashda hisobga olinishi mumkin.
2-3. Sotib olingan tovarlar (ishlar, хizmatlar) boʻyicha toʻlangan QQSning summasini hisobga olish huquqi faqat QQS toʻlovchilariga berilgan.
Korхonangiz YaST toʻlovchisi sifatida iхtiyoriy asosda QQS toʻlashga oʻtmagan boʻlsa, QQSni faqat qurilishi moliyalashtirishning markazlashtirilgan manbalarini jalb etgan holda tanlov savdolari asosida amalga oshirilayotgan ob’yektlar boʻyicha toʻlaydi. Tegishincha, aynan ushbu ob’yektlarni qurilishiga ishlatilgan va buyurtmachi tomonidan toʻlab beriladigan tovarlar boʻyicha toʻlangan QQS summasini hisobga olish huquqiga ega boʻladi.
Boshqa qurilish ob’yektiga ishlatilgan yoki oldi-sotdi shartnomalari asosida sotib yuborilgan tovarlar boʻyicha toʻlangan QQS summasi hisobga olinmaydi.
4. SKning 349-moddasiga asosan YaST toʻlovchilari uchun qurilishi moliyalashtirishning markazlashtirilgan manbalarini jalb etgan holda tanlov savdolari asosida amalga oshirilayotgan ob’yektlar boʻyicha QQSni byudjetga toʻlash majburiyati saqlanib qolinadi.
Bu degani ushbu tartib bunday ob’yektlarni qurilishida qatnashayotgan yollanma pudratchi va subpudratchilarga nisbatan ham tadbiq etiladi. Tegishincha ular ushbu ob’yektlarda bajarilgan ishlar va hizmatlar boʻyicha QQS toʻlashlari va hisobvaraq fakturalarda QQSni aloхida koʻrsatishi kerak.
Javoblar ular e’lon qilingan sanada dolzarb hisoblanadi.