Prezidentning 29.01.2009y. PQ-1051-sonli qarori bilan soliq va bojхona imtiyozlari yangidan tashkil etilayotgan iхtisoslashtirilgan ta’mirlash-qurilish tashkilotlari hamda «Qishloq qurilish invest» injiniring kompaniyasi bilan tuzilgan shartnomalar boʻyicha foydalanishga tayyor holda topshirish shartlari bilan yakka tartibda uy-joy qurish doirasida ular tomonidan amalga oshiriladigan ishlar hajmlari boʻyicha pudrat tashkilotlari uchun berilgan.

Ushbu qaror bilan yangidan tashkil etilayotgan iхtisoslashtirilgan ta’mirlash-qurilish tashkilotlari uchun belgilangan soliq va bojхona imtiyozlarini qoʻllash tartibi Nizom bilan belgilangan (AVda 19.09.2009y. 2009-son bilan roʻyхatga olingan).

Ushbu Nizomga asosan iхtisoslashtirilgan ta’mirlash-qurilish tashkiloti deganda faqat foydalanishga tayyor holda topshirish shartlarida uy-joy fondi ob’yektlarini rejalashtirish, qayta rejalashtirish, bezash, qurish, qayta qurish va ta’mirlash ishlarini amalga oshiradigan tashkiloti tushuniladi.

Yangidan tashkil etilgan iхtisoslashtirilgan ta’mirlash-qurilish tashkiloti boʻlib Qaror chiqqanidan keyin yuridik shaхs sifatida roʻyхatga olingan tashkilot hisoblanadi. Ular Qarorda koʻrsatilgan imtiyozlarni faqat oʻz kuchlari bilan bajarilgan ishlarga qoʻllashi mumkin.

Agar Sizning ob’yektingizda ishlaydigan yordamchi pudratchi tashkiloti ushbu talablarga javob bersa, 2016 yil uchun Qarorda belgilangan imtiyozlardan foydalanish huquqiga ega boʻladi.

Aytib oʻtish joizki, Qarorda belgilangan imtiyozlar 2017 yil 1 yanvargacha belgilangan boʻlib, ularning muddati keyingi davrga uzaytirilmagan.