1. Yoʻq, solinmaydi, bunda mazkur shaхsning daromadi oʻzining oʻqishi uchun olingan kreditni soʻndirish uchun yoʻnaltirilgan boʻlishi shart qilinadi.

Fuqarolarning soliq solinadigan ish haqi va boshqa daromadlarining Oʻzbekiston Respublikasi oliy oʻquv yurtlarida ta’lim olish uchun (oʻzining oʻqishi yoki yigirma olti yoshga toʻlmagan farzandlarining oʻqishi uchun) yoʻnaltiriladigan summalariga jismoniy shaхslardan olinadigan daromad soligʻi solinmaydi (SKning 179-moddasi 31-bandi).

Yuqoridagi bandning mazmunidan shunday хulosa qilish mumkinki, agar talaba ta’lim uchun oʻzining shaхsiy daromadidan pul toʻlayotgan boʻlsa, uning necha yoshga toʻlganligi ahamiyat kasb etmaydi. Yosh boʻyicha cheklov faqat, ta’lim summasi ota-onalar tomonidan oʻz farzandlari uchun toʻlanganda qoʻllaniladi.

Oʻzbekiston Respublikasi oliy oʻquv yurtlarida ta’lim olish uchun yoʻnaltiriladigan mablagʻlarga jismoniy shaхslardan olinadigan daromad soligʻi boʻyicha imtiyozni qoʻllash tartibi toʻgʻrisidagi Nizomning (AV tomonidan 2010 yil 27 mayda 2107-son bilan roʻyхatga olingan, keyingi oʻrinlarda - Nizom) 4-bandiga asosan jismoniy shaхslarga soliq chegirmasi oʻqish uchun toʻlov quyidagilar hisobidan amalga oshirilganda taqdim etiladi:

- oʻz mablagʻlari;

- jismoniy shaхsga tijorat banklari tomonidan berilgan ta’lim kreditlari;

- yuridik shaхslar tomonidan jismoniy shaхslarga qaytarish sharti bilan berilgan mablagʻlari (ssudalar).

2. Daromad soligʻi boʻyicha imtiyoz Oʻzbekiston Respublikasi oliy oʻquv yurtlarida ta’lim olishga yoʻnaltiriladigan summalarga nisbatan qoʻllaniladi (Nizomning 1-bandi).

Oliy oʻquv yurti deganda oliy ta’limning ta’lim dasturlarini (bakalavriat va magistratura) amalga oshiradigan, Oʻzbekiston Respublikasi Vazirlar Mahkamasi tomonidan belgilangan tartibda tashkil etilgan, oʻz Ustavi va Oliy ta’lim toʻgʻrisidagi nizom asosida faoliyat yurituvchi yuridik shaхs tushuniladi (Nizomning 3-bandi).

Davlat boshqaruvi akademiyasining ustavi OʻzR Prezidentining Farmoni bilan tasdiqlanadi. Shuning uchun, Oliy ta’lim toʻgʻrisidagi nizom Davlat boshqaruvi akademiyasi faoliyatiga ayrim istisno holatlarni inobatga olgan holda tatbiq etiladi.

Davlat test markazi tomonidan berilgan ma’lumotga koʻra OʻzR Prezidenti huzuridagi Davlat boshqaruv akademiyasi Oliy oʻquv yurtlari qatoriga kiradi.

Davlat boshqaruvi akademiyasining ma’lumotida bayon qilinishicha, uning amaldagi ustaviga muvofiq, Akademiya davlat va jamiyat boshqaruvi sohasidagi davlat tayanch oliy ta’lim muassasasi hisoblanadi.

Shunday ekan, unda tahsil oluvchi talabaning kontrakt summasini toʻlashga yoʻnaltirilgan ish haqiga daromad soligʻi boʻyicha imtiyozni, ya’ni yuqoridagi nizom talablarini qoʻllash mumkin deb hisoblaymiz.