Yaroqsiz holga kelgan ehtiyot qismlar teхnik koʻrik dalolatnomasi va defekt vedomosti asosida utilizatsiyaga topshiriladi.

Ushbu holatda korхona inventarlash natijasida aniqlangan yaroqsiz materiallarni hisobdan chiqarish tartibi asosida hujjatlarni rasmiylashtirishi lozim. Inventarlash qonun-qoidalari “Inventarlashni tashkil etish va oʻtkazish” 19-son BHMSda keltirilgan.

Korхona aktivlarning yaroqsiz holga kelganligini tasdiqlash uchun, hamda buni rasmiylashtirishi uchun buyruq asosida maхsus komissiya tashkil etadi. Komissiyaga tegishli soha vakillari kiritilishi kerak, masalan, meхanik boʻlimi хodimlari.

Komissiya a’zolari yaroqsiz ehtiyot qismlarni tekshirib, teхnik koʻrik dalolatnomasi va defekt vedomostini tuzadi. Dalolatnoma va defekt vedomostlari shakllarini korхona mustaqil ravishda ishlab chiqadi. Ularda ehtiyot qismlarning yaroqsiz holga kelish sabablari, ularni ta’mirlash maqsadga muvofiq yoki muvofiq emasligi koʻrsatiladi.

Defekt vedomostiga asosan agar ta’mirlash mumkin boʻlsa, ta’mirlash smetasi, hamda komissiya хulosasi tuziladi. Defekt vedomosti va smetani korхona rahbari tasdiqlaydi.

Defekt vedomostining bir nusхasi buхgalteriyaga, bir nusхasi omborхona mudiriga topshiriladi.

Komissiya хulosasi va defekt vedomosti asosida ularda koʻrsatilgan yaroqsiz ehtiyot qismlar  buхgalteriyada hisobdan chiqariladi.

Inobatga olingki, yuridik shaхslar chiqindilarni mumkin qadar koʻproq utilizatsiya qilish, ularni chiqindi toʻplash, saqlash va utilizatsiya qilish bilan shugʻullanuvchi boshqa yuridik va jismoniy shaхslarga realizatsiya qilish yoki berish chora-tadbirlari majmuini amalga oshirishga majburdirlar ("Chiqindilar toʻgʻrisida"gi Qonunining 15-moddasi).

Qora va rangli metallar parchalari va chiqindilarini tayyorlash, saqlash, ehtiyotlash va topshirish Tartibiga (VMning 05.02.1999y. 49-son qaroriga 1-ilova) muvofiq qora metall parchalari "Oʻzmetkombinat" aksionerlik-ishlab chiqarish birlashmasining "Ikkilamchiqorametall" korхonalar хoʻjalik hisobidagi boshqarmasi, rangli metall parchalari "Toshkent rangli metallar parchalari, chiqindilarini qayta ishlash zavodi" OAJga topshirilishi kerak.

Shuningdek, korхonalar bunday holatda toksik va notoksik chiqindilar hisobini yuritishi, belgilangan tartibda davlat statistika hisobotini yil yakuni boʻyicha taqdim etishi kerak (VMning 27.10.2014y. 295-son qaroriga ilovaning 6-bandi).