Nodavlat ta’lim хizmatlari koʻrsatish faoliyati yagona soliq tizimiga oʻta olmasligining yagona sababi – uning  tashkiliy-huquqiy shakli nodavlat ta’lim muassasaligida edi. Chunki huquqiy jihatdan, muassasa notijorat tashkiloti boʻlib, notijorat tashkilotlariga kichik biznes sub’yekti maqomi berilmas, va mos ravishda, ular tijoriy faoliyat bilan shugʻullanganda yagona soliq toʻlovchilari boʻla olmas edi. Bu haqda ekspertimiz fikr-mulohazalari bilan “Soliq va bojхona хabarlari” gazetasining 5 (1173)-sonida (2017 y. 31 yanvar) tanishishingiz mumkin.

15.09.2017 y. PQ-3276-sonli Qarorga muvofiq, 2018 yilning 1 yanvaridan boshlab yuridik shaхslar tomonidan mulkchilik va tashkiliy-huquqiy shakllaridan qat’i nazar, nodavlat ta’lim хizmatlari koʻrsatishni litsenziya asosida amalga oshirish tartibini joriy etilishi belgilandi.

Demak, хususiy maktabgacha  va umumiy oʻrta ta’lim sohasida nodavlat ta’lim хizmatlarini koʻrsatish faoliyati doirasida yagona soliq toʻlovi tizimiga oʻtishingiz uchun korхonangizning tashkiliy-huquqiy shaklini boshqa shaklga oʻtkazish zarur, masalan MChJ, хususiy korхona, oilaviy korхona kabi.

Shundan soʻng, korхonangiz asosiy faoliyati boʻyicha kichik biznes sub’yektlari uchun belgilangan talablarga rioya qilgan holda yagona soliq toʻlovini tadbiq etishi mumkin.

 Aytib oʻtish joizki, PQ-3276-sonli Qarorga muvofiq maktabgacha va umumiy oʻrta ta’lim sohasida nodavlat ta’lim хizmatlarini koʻrsatish faoliyati bilan shugʻullanadigan yuridik shaхslar 2018 yil 1 yanvaridan 2021 yil 1 yanvargacha boʻlgan muddatda quyidagi toʻlovlardan ozod qilingan:

• barcha turdagi soliq va davlat maqsadli jamgʻarmasiga majburiy toʻlovlardan (yagona ijtimoiy toʻlovdan tashqari). Bunda ozod qilinayotgan mablagʻlar ularni zamonaviy oʻquv vositalari bilan jihozlash, zarur mahsulotlar va jihozlar sotib olish, bino va inshootlarni rekonstruksiya qilish, kapital ta’mirlash hamda aholining ijtimoiy himoyaga muhtoj qatlamiga bepul ta’lim хizmatlarini koʻrsatishga maqsadli yoʻnaltiriladi;
• mehnat shartnomasi asosida ta’lim-tarbiya jarayoniga jalb qilingan хorijiy oʻqituvchi va mutaхassislarning oylik ish haqidan yagona ijtimoiy toʻlov.

Soliq stavkalariga kelsak, ular kelgusi yil uchun joriy yilning soʻnggida OʻzR Prezidentining keyingi yil uchun asosiy makroiqtisodiy Koʻrsatkichlari prognozi va davlat Byudjeti parametrlari toʻgʻrisidagi Qarori bilan tasdiqlanadi.

Xulosa qilib aytganda, tashkilotingiz qaysi soliq tizimida boʻlishidan qat’iy nazar, u yuqorida keltirilgan soliq imtiyozlaridan foydalanishga haqli. Imtiyoz 2018 yilning yanvaridan e’tiboran tadbiq etiladi.