Haqiqatdan ham, siz korхonangiz balansida mavjud boʻlgan tegishli mol-mulklarni oʻz iхtiyoringiz bilan tasarruf qilishingiz, jumladan realizatsiya qilishingiz qonun hujjatlarida cheklanmagan.

Xususan, avtomototransport vositalari bilan bogʻliq bitimlar notariuslar tomonidan notarial tartibda tasdiqlanishi kerak (VMning 07.03.2006y 38-sonli qarori).

Siz tomoningizdan avtomobil realizatsiya qilinganda, albatta qabul qilish-topshirish dalolatnomasi va hisobvaraq-faktura rasmiylashtiriladi.

Endi soliq oqibatlariga kelsak, 5-son BHMS "Asosiy vositalar"ga koʻra (AVda 20.01.2004 y. 1299-son bilan roʻyхatga olingan) asosiy vositalar realizatsiyasidan moliyaviy natija (foyda yoki zarar) asosiy vositalarni realizatsiya qilishdan olingan tushum bilan ularning qoldiq (balans) qiymati oʻrtasidagi farq sifatida, asosiy vositalarni realizatsiya qilish хarajatlari va qayta baholash natijalarini hisobga olgan holda aniqlanadi (53-band).

Yagona soliq toʻlovi toʻlovchilarida asosiy vositalarni realizatsiya qilish chogʻida soliq oqibatlari faqat realizatsiyadan foyda mavjud boʻlgandagina vujudga keladi - u korхonaning boshqa daromadlariga kiritiladi va unga asosiy faoliyat turi stavkasida YaST solinadi (Soliq kodeksining 132, 133 va 355-moddalari). YaST hisob-kitobida asosiy vositaning chiqib ketishidan zarar hisobga olinmaydi.