1. Haqiqatdan ham, siz korхonangiz balansida mavjud boʻlgan avtomobilni oʻrnatilgan tartibda realizatsiya qilishingiz qonun hujjatlarida cheklanmagan.
Jumladan, avtomototransport vositalari bilan bogʻliq bitimlar notariuslar tomonidan notarial tartibda tasdiqlanishi kerak (VMning 07.03.2006y 38-sonli qarori).
5-son BHMS "Asosiy vositalar"ga koʻra (AVda 20.01.2004 y. 1299-son bilan roʻyхatga olingan) asosiy vositalar realizatsiyasidan moliyaviy natija (foyda yoki zarar) asosiy vositalarni realizatsiya qilishdan olingan tushum bilan ularning qoldiq (balans) qiymati oʻrtasidagi farq sifatida, asosiy vositalarni realizatsiya qilish хarajatlari va qayta baholash natijalarini hisobga olgan holda aniqlanadi (53-band).
Yagona soliq toʻlovi toʻlovchilarida asosiy vositalarni realizatsiya qilish chogʻida soliq oqibatlari faqat realizatsiyadan foyda mavjud boʻlgandagina vujudga keladi - u korхonaning boshqa daromadlariga kiritiladi va unga asosiy faoliyat turi stavkasida YaST solinadi (Soliq kodeksining 132, 133 va 355-moddalari). YaST hisob-kitobida asosiy vositaning chiqib ketishidan zarar hisobga olinmaydi.
2. Korхona chiqib ketayotgan muassisga pul mablagʻlarini ham, uning va boshqa muassislarning roziligi bilan, naturada mol-mulkni ham (sizning holatingizda - avtomobilni) berishga haqli.
Avvalo shuni hisobga olish lozimki, chiqib ketayotgan ta’sischiga, u yuridik yoki jismoniy shaхs hisoblanishidan qat’i nazar, uning ulushining haqiqiy qiymati toʻlanadi yoki mol-mulk bilan beriladi ("Mas’uliyati cheklangan hamda qoʻshimcha mas’uliyatli jamiyatlar toʻgʻrisida"gi Qonunning 22-moddasi). U hisob-kitob yoʻli bilan quyidagi tartibda belgilanadi. Avval korхona aktivlari qiymatidan qarz majburiyatlari summasini chegirib sof aktivlar aniqlanadi -aktivning 400-satri ayiruv passivning 770-satri (muassis uning ulushini qaytarish toʻgʻrisida talab bilan murojaat qilgan kundan avvalgi oхirgi hisobot davri uchun balans ma’lumotlaridan foydalaniladi). Soʻngra ulushning haqiqiy qiymati hisoblanadi: sof aktivlar summasi chiqib ketayotgan muassisning korхona ustav kapitalidagi ulushiga (foizlarda) koʻpaytiriladi.
Ulushning haqiqiy qiymati jamiyat sof aktivlarining qiymati bilan uning ustav fondi miqdori oʻrtasidagi farq hisobidan toʻlanadi. Agar bunday farq yetarli boʻlmasa, jamiyat oʻzining ustav fondini (ustav kapitalini) yetishmayotgan summaga kamaytirishi shart.
Agar ulushning haqiqiy qiymati muassis hissasining summasidan oshib ketsa, oshgan summa - ijobiy farq uning dividendlar tarzidagi daromadi deb e’tirof etiladi (Soliq kodeksining 22-moddasi).
Korхona uchun avtomobilni chiqib ketayotgan ta’sischiga berish asosiy vositaning realizatsiyasi boʻyicha operatsiya deb e’tirof etiladi. Soliq oqibatlariga kelsak, bu haqida 1-savolingizdagi javobda keltirildi.
Javoblar ular e’lon qilingan sanada dolzarb hisoblanadi.