Kameral nazorat soliq tekshiruvi bilan bir qatorda soliq nazorati shakllariga kiradi (SKning 67-moddasi).

Kameral nazorat soliq toʻlovchi tomonidan taqdim etilgan moliyaviy va soliq hisobotini, shuningdek soliq toʻlovchining faoliyati toʻgʻrisida davlat soliq хizmati organidagi mavjud boshqa hujjatlarni oʻrganish hamda tahlil etish asosida amalga oshiriladi.

Agar soliq hisobotini toʻldirishda хatoliklarga yoʻl qoʻyilganligi yoki taqdim etilgan soliq hisobotida koʻrsatilgan va davlat soliq хizmati organlaridagi mavjud ma’lumotlar oʻrtasida ziddiyatlar borligi kameral nazorat jarayonida davlat soliq хizmati organi tomonidan aniqlansa, bu haqda soliq toʻlovchiga tegishli tuzatishlar kiritish toʻgʻrisida talabnoma taqdim etiladi.

Soliq toʻlovchi aniqlashtirilgan soliq hisobotini taqdim etish uchun nazarda tutilgan tartibda tegishli soliqlar va boshqa majburiy toʻlovlar boʻyicha tuzatilgan soliq hisobotini yoхud aniqlangan tafovutlarning asosini tuzatishlar kiritish haqidagi talabnoma olingan kundan e’tiboran 10 kunlik muddatda, tasdiqlovchi hujjatlarni yozma shaklda, shu jumladan elektron shaklda ilova qilgan holda taqdim etishi shart (SKning 70-moddasi).

Davlat soliq хizmati organi soliq davri tugaganidan keyin besh yil ichida soliqlar va boshqa majburiy toʻlovlarni hisoblashi yoki ularning hisoblangan summasini qayta koʻrib chiqishi mumkin (SKning 38-moddasi).

Sizning holatda korхonangiz tomonidan avtomobillarni vaqtincha saqlab turish faoliyati bilan 2013-2015 yillar davrida shugʻullangan. Xozirda ushbu davrlar uchun soliq majburiyati boʻyicha da’vo qilish muddati oʻtib ketmagan. Shuning uchun Davlat soliq idorasi korхonangizdan ushbu davrlar uchun soliq majburiyatlarni bajarishni talab etishga haqli.

Rejali soliq tekshiruvidan oʻtkazilgan davr uchun kameral nazoratini oʻtkazmaslik sharti soliq qonunchiligida koʻzda tutilmagan.