Касаллик даври узоқ давом этганда иш ҳақини тўлаш

«Иш ҳақининг иккинчи қисмини ҳисоблашда ходимга тўлов тўланмаслиги мумкинми? 16-санада аванс берилди, шу кундан бошлаб ходимга касаллик варақаси очилган ва ҳанузгача ёпилмаган. Ойнинг иккинчи ярмида у ишга келмаган ва касаллик варақасини ҳам тақдим этмаган».

– Касаллик даври бошланган пайтдан эътиборан ходимга иш ҳақи ҳисобланиши тўхтатилади.

Берилган аванс ушбу давргача ходим ишлаб топган суммани қопламаган тақдирда, унга ой якунлари бўйича қолган сумма ҳисоблаб ёзилади ва тўланади.

Меҳнатга қобилияти йўқолган биринчи кундан бошлаб  ходим вақтинча меҳнатга қобилиятсизлик бўйича нафақани олишга ҳақли. Ушбу нафақа тиббий муассаса томонидан бутун касаллик даври учун тўлиқ расмийлаштирилган ҳужжатга (меҳнатга лаёқатсизлик варақасига) асосан ҳисоблаб чиқарилади ва тўланади.

Меҳнатга қобилияти тикланиши ва тегишинча «касаллик варақаси» узоқ муддат давом этадиган бўлса, ходим корхонада навбатдаги иш ҳақи берилиши вақти келганда даволаш муассасасига унинг меҳнатга қобилиятсизлик варақасини ёпиб кейин яна бошқасини расмийлаштиришларини сўраб мурожаат қилишга ҳақли.

Тиббий муассаса ходими аввалги касаллик варақасининг «Ишга тушиш куни» устунида сана ўрнига «касаллик давом этяпти» деган ёзувни қайд этади. Кейинги кундан бошлаб эса тиббий муассаса ходимга янги меҳнатга лаёқатсизлик варақасини очади .

 Валерия ЛЯНДРЕС,

«Норма» компанияси эксперти.