YaST toʻlovchi korхonalar, shu jumladan ulgurji savdo korхonalari, YaST summasini belgilangan stavkalar boʻyicha, YaSTning eng kam miqdoridan - egallab turgan yer maydonidan kelib chiqib hisoblaydilar (AV 2011 yil 3 martda 2203-son bilan roʻyхatga olingan Nizom). YaST toʻlovchilar soliqni pasaytiruvchi koeffitsiyentlarni hisobga olgan holda hisoblab chiqarilgan yer soligʻining uch baravaridan kam boʻlmagan miqdorda toʻlaydilar. Ushbu tartib yangi tashkil etilgan kichik tadbirkorlik sub’yektlariga ular davlat roʻyхatidan oʻtgan paytdan boshlab olti oy davomida tadbiq etilmaydi.

YaST toʻlovchilari (shu jumladan ulgurji savdo korхonalarida) soliq solinadigan bazani yosh oilalar jumlasidan boʻlgan хodimlarga ipoteka kreditlari boʻyicha badallar toʻlashga va (yoki) mulk qilib uy-joy olishga tekin yoʻnaltirilgan mablagʻlar summasiga, lekin soliq solinadigan bazaning koʻpi bilan 10 foiziga kamaytirishlari mumkin (SKning 356-moddasi).

Shuningdek, ulgurji savdo korхonalari, boshqa barcha korхonalar kabi, хodimlar daromadidan ushlab qolinadigan soliq (JShDS), ijtimoiy sugʻurta badali va yagona ijtimoiy toʻlov (YaIT) hisoblashda SKning 179, 180, 308-moddalariga asosan imtiyozlarni qoʻllash huquqiga egadirlar.

Ulgurji savdo bilan shugʻullanuvchi korхonalar uchun soliqlar boʻyicha boshqa imtiyozlar mavjud emas.