Jismoniy shaхsda yer soligʻini toʻlash majburiyati ushbu jismoniy shaхsda unga yer uchastkasi ajratilganidan keyingi oydan e’tiboran yuzaga keladi (SKning 294-moddasi).

Tadbirkorlik faoliyatida foydalaniladigan yer uchastkalari uchun yakka tartibdagi tadbirkorga ijaraga berilganda, shuningdek jismoniy shaхslarning mulkida boʻlgan, yashash uchun moʻljallanmagan joylar egallagan yer uchastkalari uchun jismoniy shaхslardan yer soligʻi yuridik shaхslar uchun belgilangan stavkalar boʻyicha undiriladi (SKning 291-moddasi). Jismoniy shaхslar uchun yer soligʻi boʻyicha imtiyozlar SKning 290-moddasida belgilangan, lekin tadbirkorlik faoliyatida foydalanish uchun yer uchastkalari ajratib berilgan yakka tartibdagi tadbirkorlarga ushbu imtiyozlar tatbiq etilmaydi (bundan SKning 291-moddasi ikkinchi qismida nazarda tutilgan hollar mustasno).

Agar yer uchastkasida jismoniy shaхs yakka tartibdagi tadbirkor sifatida ruхsat etilgan faoliyat turi bilan shugʻullansa, unda qat’iy belgilangan soliq toʻlash majburiyati yuzaga keladi (SKning 58-bobi). Soliq stavkalari faoliyat turiga bogʻliq boʻladi va har yili Prezident Farmoni bilan oʻrnatiladi. Shuningdek unda yer soligʻi toʻlash majburiyati saqlanib qoladi.

Yer uchastkasida tadbirkorlik faoliyati yuridik shaхsni tashkil etgan holda amalga oshiriladigan boʻlsa, ushbu yuridik shaхs qaysi tadbirkorlik sub’yektiga mansub (kichik yoki yirik) boʻlishiga qarab (shuningdek u tanlagan soliq solish tizimiga qarab) umumbelgilangan soliqlar toʻlovchisi yoki yagona soliq toʻlovi (YaST) toʻlovchisi boʻlishi mumkin. 1 gektardan ortiq yer maydoni boʻlgan YaST toʻlovchi yuridik shaхs shuningdek yer soligʻini ham toʻlaydi. Yuridik shaхs yuritayotgan faoliyat turiga qarab qat’iy belgilangan soliq toʻlovchisi boʻlishi ham mumkin.

Soliqlar boʻyicha imtiyozlar Soliq Kodeksining har bir soliq turiga tegishli boblarida belgilangan.