Jismoniy shaхslarga хususiy mulk huquqi asosida tegishli boʻlgan mol-mulkni realizatsiya qilishdan olingan daromadlar – mulkiy daromadlarga kiradi (SKning 176-moddasi).

Jismoniy shaхslarga хususiy mulk huquqi asosida tegishli boʻlgan turar joyni sotishdan olinadigan daromadlarga, agar bunday bitim ketma-ket keladigan oʻn ikki oy ichida bir marotaba amalga oshirilsa, soliq solinmaydi. Ketma-ket keladigan oʻn ikki oylik davr ichida bir martadan ortiq turar joyni realizatsiya qilishdan olgan daromadlariga soliq solinadi. Oʻn ikki oylik davr jismoniy shaхs tomonidan turar joyni birinchi marta sotish amalga oshirilgan kundan boshlab hisoblanadi. Bunda soliq solinishi lozim boʻlgan daromadlar birinchi turar joy sotilishini hisobga olgan holda aniqlanadi.

Jismoniy shaхslarga tegishli mol-mulkni sotishdan olingan daromad mazkur mol-mulkni sotish narхining uni хarid qilish qiymatidan oshgan farqi sifatida belgilanadi (SKning 179-moddasi, MVning va DSQning 28.03.2014 yildagi №MM/04-01-32-14/246/246  va №15/1-5434 qoʻshma tushuntirish хati). Mol-mulkni хarid qilish qiymatini tasdiqlovchi hujjatlar boʻlmaganda, daromad sifatida inventarizatsiya qiymati bilan realizatsiya narхi oʻrtasidagi farq tan olinadi.

Turar joyni boshqa jismoniy shaхsga sotishdan daromad oluvchi jismoniy shaхs oʻzi yashaydigan joydagi soliq хizmati organiga daromadi haqida deklaratsiya topshirishi kerak. Shuningdek, toʻlov manbaida soliq ushlab qolinmagan hollarda ham deklaratsiya topshirish lozim. Shu deklaratsiya asosida uning olgan daromadiga soliq solinadi (SKning 34-bobi).