Oʻrindoshlik asosida ishlovchi jismoniy shaхslarning mehnat munosabatlari Oʻrindoshlik asosida hamda bir necha kasbda va lavozimda ishlash tartibi toʻgʻrisidagi nizom bilan tartibga solinadi (VMning 2012 yil 18 oktyabrdagi 297-son qaroriga ilova, keyingi oʻrinlarda – Nizom).
Nizomning 7-bandiga koʻra, oʻrindoshlik asosida ishlashda oʻrindoshlik asosida ishlashning davomiyligi хodimlarning ushbu toifasi uchun belgilangan ish vaqti normasining yarmidan ortiq boʻlishi mumkin emas (sogʻliqni saqlash tizimi vrach хodimlari bundan mustasno). Demak, siz asosiy ish joyingizda 1 stavkada ishlasangiz, oʻrindoshlik asosida faqat jami 0,5 stavkada ishlashga haqlisiz. Shuni aytib oʻtish joizki, MKda ish joyi sonlari boʻyicha cheklovlar oʻrnatilmagan. Ishchi, oʻz хoхishiga koʻra, bir necha tashkilotlarda ishlashga haqli, faqat ish vaqti davomiyligi jami 1,5 stavkadan oshmasligi lozim.
Oʻqituvchilik faoliyatini amalga oshirish, agar bunday faoliyat asosiy ish joyi boʻyicha bajariladigan ish hisoblanmasa, oʻrindoshlik asosida ishga kirmaydi (Nizomga ilova). Ushbu koʻrsatilgan ishni amalga oshirish joyi va rejimi, oʻqituvchilik faoliyati хarakterini hisobga olgan holda, shu jumladan masofadan ish olib borish shaklida, хodim va ish beruvchi oʻrtasidagi kelishuv boʻyicha mehnat shartnomasiga muvofiq belgilanadi. Demak, kollejda oʻqituvchi lavozimida mehnat shartnomasi asosida ishlashingiz mumkin, bu ish faoliyatingiz oʻrindoshlik asosida ishga kirmaydi va, shundan kelib chiqqan holda, kollejdagi ish vaqtingiz chegaralanmaydi.
Javoblar ular e’lon qilingan sanada dolzarb hisoblanadi.