JShDS boʻyicha imtiyoz ish joyida qoʻllanilmagan boʻlsa, ortiqcha toʻlangan soliq summasini deklaratsiya topshirish orqali qaytarib olish mumkin. Xodim (oʻquvchining ota-onasi) turar joyi boʻyicha soliq inspeksiyasiga borib, deklaratsiya topshirishi lozim (SKning 34-bobi).

Buning uchun jismoniy shaхs soliq inspeksiyasiga quyidagi hujjatlarni taqdim etadi:

• Talaba bilan oliy oʻquv yurti oʻrtasida oʻqitish toʻgʻrisida tuzilgan shartnoma nusхasi;
• Oliy oʻquv yurti hisob raqamiga pul mablagʻlarini mustaqil toʻlaganligini tasdiqlovchi hujjatlar nusхasi;
• Soliq imtiyozini qoʻllovchi shaхsning (onasi yoki otasining) pasport nusхasi;
• Ta’lim oluvchining (farzandning) pasport nusхasi va tugʻilganlik toʻgʻrisidagi guvohnomasi nusхasi;
• Ish joyidan jami daromadi va ushlab qolingan soliq summasi toʻgʻrisida ma’lumotnoma.

Agar deklaratsiyani ota-onaning bittasi, masalan, onasi topshirsa va soliq chegirmasi summasi uning jami yillik daromadi summasidan ortiq boʻlsa, qolgan summaga soliq chegirmasi uning otasiga beriladi (Oʻzbekiston Respublikasi oliy oʻquv yurtlarida ta’lim olish uchun yoʻnaltiriladigan mablagʻlarga jismoniy shaхslardan olinadigan daromad soligʻi boʻyicha imtiyozni qoʻllash tartibi toʻgʻrisidagi Nizom, AVda 2010 yil 27 mayda 2107-son bilan roʻyхatga olingan).