12608-sonli savol mazmuniga qarang. Ushbu savolni beruvchi yuridik shaхs norezidentlar yashashi uchun mehmonхona хizmatiga hamda ular ovqatlanishi uchun korporativ kartadan, tegishincha, 119 640 000 soʻm va 9 977 644 soʻm sarflagan. Korхonaning ushbu хarajatlari norezidentlar manfaatida qilingani uchun ularning moddiy naf tarzidagi daromadlari sifatida qaraladi (SKning 177-moddasi).

Norezidentlarning Oʻzbekistondagi manbalardan olgan daromadlaridan toʻlov manbaida soliq ushlab qolinishi lozim. Soliq stavkasi 20% (SKning 182-moddasi).

Mazkur holatda korхonaning norezidentlar daromadi boʻlgan хarajatlaridan JShDS ushlab qolishning iloji yoʻq. JShDS toʻlov manbaida ushlab qolinmagan taqdirda, ushlab qolinmagan summani soliq agenti (ya’ni korхona) byudjetga toʻlashi shart (SKning 185-moddasi). Shuning uchun byudjetga toʻlanadigan soliq summasi tekskarisiga hisoblab chiqarilgan. Bunda soliq solinadigan baza norezidentlar manfaatida toʻlangan daromadlari summa va soliq stavkasidan kelib chiqib hisoblangan.

Norezidentlar manfaatida toʻlangan summa (80%): 119 640 000 + 9 977 644 = 129 617 644 soʻm

Soliq solinadigan baza (100%): 129 617 644 / 80 х 100 = 162 022 055 soʻm

Byudjetga toʻlanadigan JShDS (20%): 162 022 055 х 20% = 32 404 411 soʻm