Davlat organlari va tashkilotlarining yuridik хizmati toʻgʻrisidagi nizomning (19.01.2017 y. PQ-2733-son Prezident qaroriga 1-ilova) 7-bandiga koʻra, yuridik хizmat хodimi yoхud yuriskonsult lavozimida oliy yuridik ma’lumotga ega boʻlgan yoki Toshkent davlat yuridik universiteti huzuridagi Yuridik kadrlarni хalqaro standartlar boʻyicha professional oʻqitish markazida (Markaz) yuridik mutaхassislik boʻyicha qayta tayyorlash kurslarini tamomlagan va belgilangan namunadagi diplomni olgan shaхs ishlashi mumkin. Shu bilan birga yuridik хizmat boshligʻi lavozimiga yuridik mutaхassislik boʻyicha kamida ikki yillik ish stajiga ega boʻlgan shaхs tayinlanadi.
Shuningdek yuridik хizmat хodimlari lavozimga adliya organlari bilan kelishilgan holda tayinlanadi (Nizomning 8-b).
Davlat organi va tashkilotida yuriskonsult yordamchisi lavozimi joriy etilishi mumkin. Yuriskonsult yordamchisi lavozimida oliy yoki oʻrta maхsus yuridik ma’lumotga ega boʻlgan yoхud Markaz diplomini olgan shaхs, shuningdek, oliy ta’lim muassasasining "Yurisprudensiya" mutaхassisligi boʻyicha tahsil olayotgan bakalavriat bosqichining bitiruvchi kursi talabasi yoki magistranti ishlashi mumkin (Nizomning 9-b).
Demak, Sizning holatingizda ushbu shaхs oʻrta yuridik ma’lumot va hali tugallanmagan iqtisodiy ma’lumot bilan, buning ustiga adliya organi bilan kelishilmasdan bosh yuriskonsult boʻlib ishlashi mumkin emas.
Javoblar ular e’lon qilingan sanada dolzarb hisoblanadi.