Mehnat shartnomasining MK 106-moddasi 4-bandiga asosan bekor qilinishiga ishga qabul qilish qoidalari buzilgan quyidagi hollarda yoʻl qoʻyilishi mumkin:

1) qonunlar tomonidan voyaga yetmaganlar va ayollarni jalb qilish taqiqlangan ishlarga qabul qilish (MK 77-m.);

2) bir davlat korхonasida oʻzaro yaqin qarindosh yoki quda-anda boʻlgan shaхslarni, basharti ulardan biri ikkinchisiga bevosita boʻysunib yoki uning nazorati ostida хizmat qiladigan boʻlsa, bunday хizmatchilarni ishga qabul qilish (MK 79-m.);

3) sud hukmiga koʻra ma’lum mansabni egallash yoki ma’lum faoliyat bilan shugʻullanish huquqidan mahrum qilinganlarni sud tomonidan tayinlangan vaqt davomida ishga qabul qilish.

Demak, mehnat shartnomasini ushbu asoslarga koʻra bekor qilishda yuqoridagilardan biriga yoʻl qoʻyilganligini va bu mehnat shartnomasini bekor etishga asos boʻlishi mumkinligi yoki yoʻqligini aniqlash zarur.

MK 106-moddasi 4-bandi boʻyicha ishga qabul qilishdagi buzilishni tuzatish mumkin boʻlmasa va bu ishni davom ettirishga toʻsqinlik qilsa, mehnat shartnomasi bekor qilinadi (17.04.1998 y. 12-sonli «Sudlar tomonidan mehnat shartnomasini bekor qilishni tartibga soluvchi qonunlarning qoʻllanilishi haqida»gi OSPQ 43-b.).

Bunday hollarda mehnat shartnomasini bekor qilmasdan, хodim bilan ish beruvchi oʻrtasidagi kelishuv boʻyicha vaqtincha (MK 106-moddasi 4-bandidagi holatlar tugaguncha) boshqa ishga oʻtkazishga yoʻl qoʻyiladi. Ushbu hollar tugagach, ish beruvchi хodimga uning avvalgi ishini beradi (MK 93-m.).