Agar kalendar yilida tushum 1 mlrd.soʻmdan oshsa, YaTT soliqlar va boshqa majburiy toʻlovlarni yuridik shaхslar uchun nazarda tutilgan tartibda toʻlaydi (PQ-4086ning 8-bandi).
Tushumni hisoblash va soliqlar toʻlash AVda 19.03.2019 yilda 3143-son bilan roʻyхatga olingan Nizomga muvofiq amalga oshiriladi.
Soliq davrida tovarlarni (ishlarni, хizmatlarni) realizatsiya qilishdan olingan tushumi belgilangan miqdordan oshgan, lekin bir milliard soʻmgacha boʻlgan yakka tartibdagi tadbirkorlar YaSTni toʻlovchilar hisoblanishadi (SKning 350-moddasi).
Soliq davrida olingan yalpi tushumi bir milliard soʻmdan oshgan yagona soliq toʻlovini toʻlovchilar belgilangan chegaraviy miqdor oshib ketgan oydan keyingi oyning boshidan boshlab umumbelgilangan soliqlarni toʻlashga oʻtadi (SKning 351-moddasi 5-qismi).
Umumbelgilangan soliqlar sistemasi doirasida jumladan QQS va foyda soligʻi toʻlanadi. Foyda soligʻi boʻyicha hisobotlar topshirish hamda soliqlarni toʻlash muddatlari SKning 163 va 164-moddalari bilan belgilangan, QQS boʻyicha esa - SKning 225 va 226-moddalarida koʻrsatilgan. Bunda toʻlanadigan foyda soligʻining eng kam me’yori nazarda tutilmagan, shuning uchun faoliyat turi uchun belgilangan qat’iy belgilangan soliq me’yor qilib olinmaydi. Foyda soligʻi SK bilan belgilangan tartibda hisoblab chiqariladi va byudjetga toʻlanadi.
Yakka tartibdagi tadbirkorlik faoliyatidan olingan, ushbu Kodeksning XX boʻlimiga muvofiq yagona soliq toʻlovi yoki qat’iy belgilangan soliq solinadigan daromadlar jismoniy shaхslardan olinadigan daromad soligʻining soliq solish ob’yekti boʻlmaydi (SKning 169-moddasi). Demak, YaTT umumbelgilangan soliqlar toʻlovchisi boʻlgach, u oʻziga ish haqi hisoblashi, undan SK bilan belgilangan tartibda JShDS ushlashi, YaIT toʻlashi hamda ular boʻyicha tegishli hisobotlarni topshirishi zarur.
Suv resurslaridan foydalanganlik uchun soliq, yer va mulk soliqlari soliqqa tortiladigan ob’yekt mavjud boʻlgan taqdirda YaTT tomonidan toʻlanadi.
Javoblar ular e’lon qilingan sanada dolzarb hisoblanadi.