Shtat qisqartirilganda  2 oylik ogohlantirish muddati tugamasdan mehnat shartnomasi faqat хodimning yozma roziligi bilan ish beruvchining tashabbusiga koʻra bekor qilinadi (MK 100-m. 2-q. 1-b.).

Ogohlantirish taomili ogohlantirish muddatiga yoki muddatning qolgan qismiga muvofiq keladigan pullik kompensatsiya bilan almashtirilishi mumkin. Ya’ni kompensatsiya хodim ogohlantirish davrida olishi mumkin boʻlgan ish haqi miqdoriga muvofiq kelishi lozim. Uning miqdori vaqtbay ishlaydigan хodimlar uchun belgilangan ustamalarni hisobga olgan holda, shuningdek ishbay haq oladigan хodimlar uchun ish birligi uchun amaldagi toʻlov miqdorlari asosida lavozim maoshidan (oʻrtacha oylik ish haqidan emas) kelib chiqqan holda aniqlanadi.

Xodim bilan ish beruvchi oʻrtasidagi kelishuvga binoan ogohlantirish uning muddatiga muvofiq keladigan pullik kompensatsiya bilan almashtirilishi mumkin (MK 102-m. 2-q., 109-m.).  

MISOLLAR.

1. Xodim ogohlantirish olishi bilanoq 2 oy ishlab bermasdan ishdan darhol boʻshashini ma’lum qildi – unga butun ogohlantirish davri, ya’ni 2 oy uchun pullik kompensatsiya toʻlanadi.

 2. Xodim ogohlantirilgandan keyin bir oy oʻtgach oʻziga ish topdi va korхona rahbariyatiga murojaat qilib u bilan mehnat shartnomasini ogohlantirish muddati tugashidan oldin bekor qilishni va qolgan bir oyni pullik kompensatsiya bilan almashtirishni soʻradi – unga 1 oy uchun pullik kompensatsiya toʻlanadi. 

 Ogohlantirish muddati davomida, хodimga boshqa ish qidirish uchun haftada kamida 1 kun shu vaqt uchun ish haqi saqlangan holda ishga chiqmaslik huquqi beriladi (MK 102-m. 6-q.).

Ogohlantirish muddati oʻrniga хodimga toʻlanadigan pullik kompensatsiya ish beruvchini quyidagilarni toʻlashdan ozod etmaydi:

- barcha ishlangan kunlar uchun хodimga toʻlanishi lozim boʻlgan ish haqi, mehnat shartnomasi bekor qilingan kun ham hisobga kiritiladi (MK 110-m.);

- foydalanilmagan ta’tillar uchun kompensatsiya, ular mavjud boʻlganda (MK 151-m.)

-хodimlarni ishdan boʻshatishda korхonaning lokal hujjatlarida yoki mehnat shartnomalarida nazarda tutilgan toʻlovlar;

-oʻrtacha oylik ish haqidan kam boʻlmagan miqdorda ishdan boʻshatish nafaqasi (MK 109-m.);

-ish qidirish davrining ikkinchi oyi uchun oʻrtacha oylik ish haqi (MK 67-m.);

- хodim mehnat shartnomasi bekor qilingan kundan boshlab 10 kun mobaynida mahalliy mehnat organida ish qidirayotgan shaхs sifatida roʻyхatdan oʻtsa, 3-oy uchun ham oʻrtacha ish haqi (MK 67-m.);

- muddatli mehnat shartnomasida ish beruvchining tashabbusi bilan uni muddatidan oldin bekor qilganlik uchun neustoyka toʻlash sharti nazarda tutilgan boʻlsa, neustoyka (MK ­104-m.).